Dei kjempar om å bli Virtuos 2016

Annakvart år blir NRK sin solistkonkurranse Virtuos arrangert for unge klassiske instrumentalistar.

Vinnaren av dei fire får Den Norske Solistpris på 100.000 kroner, og blir Noreg sin kandidat i Eurovisjonens internasjonale konkurranse Eurovision Young Musicians i Köln i september.

• SJÅ VIDEO OM DELTAKARANE ØVST I SAKA.

Dei som har sjanse til å bli Virtuos 2016 er:

Trond Sagbakken (17) – trompet

Trond fekk sin første trompet då han var tre år gamal, og han studerer no 1. bachelor klassisk utøvande trompet på høgskulen på Barratt Due musikkinstitutt.

– Målet er å få ein fast jobb i eit orkester, og spele symfoniar og slikt. Men, eg har lyst å bli solist også, seier Trond.

Han seier sjølv at musikken betyr alt for han.

– Eg elskar musikk, både å spele sjølv, og å høyre på musikk. Eg likar også å arrangere musikk for ensemble og orkester. Med musikk formidlar eg kjensler og historier. Musikk seier meir enn ord.

SJÅ TROND SPELE:

Inga Våga Gaustad (17) – fiolin

Inga bur på Nesoddtangen, Akershus, og byrja å spele fiolin då ho var sju år gamal. Ho går no på Edvard Munch vidaregåande skole, i samarbeid med Barratt Due musikkinstitutt, og seier sjølv at musikk alltid har vore veldig viktig for ho.

– Eg likar veldig mykje forskjellig musikk, og likar like godt å spele kammermusikk som solostoff. I tillegg til klassisk, har eg heilt sidan eg var ganske liten vore spesielt glad i tango, seier Inga.

– Eg opplever at musikk vekker noko spesielt i oss, forsterkar kjenslene og uttrykker dei på ein måte som ord ikkje er i stand til.

SJÅ INGA SPELE:

Ludvig Gudim (17) – fiolin

Ludvig er frå Ås i Akershus. Han har spelt fiolin i sidan han var fire og eit halvt år gamal, og går på Edvard Munch vidaregåande skole.

Han synest det er vanskeleg å skildre forholdet han har til musikk.

– Eg veit ikkje kvar eg hadde vore utan, og det er ikkje noko eg har meir lyst til enn å spele musikk, seier Ludvig.

– Draumen er å kunne leve av musikken, og spele både kammermusikk, i orkester og som solist.

SJÅ LUDVIG SPELE:

Michael Andreas Grolid (18) – bratsj

Michael er frå Ås, og tar bachelorgrad på Barratt Due musikkinstitutt. Han har spelt fiolin frå han var sju år gamal, men enda opp med å spele bratsj då kvartetten han spelte i mangla nettopp ein bratsjist.

– Musikken har vore med meg heile livet, og er det eg ynskjer å satse på. Det å komme på innsida av musikken, og gjennom det forstå struktur og verkemiddel komponistane har brukt, er ein av hovudgrunnane til at eg ynskjer å bli musikar, seier Michael.

– Det er så vanvitig mykje flott musikk som eg ynskjer å spele, få eit eige forhold til og gjere til mitt eige.

SJÅ MICHAEL SPELE:

• Finalen i Virtuos 2016 går av stabelen laurdag 19. mars, og blir sendt direkte på NRK1 og NRK P2.

SJÅ SEMIFINALEN: