Filmen har enno ikkje hatt norsk premiere. Men i Sverige har den allereie blitt lagt merke til, og vant dermed prisen for beste nordiske film under Göteborg internasjonale filmfestival.
«Kompani Orheim» er tredje film frå bokseria til Tore Renberg om Jarle Klepp, og ein av årets største filmsatsingar i Noreg. Den handlar om Jarle sitt kompliserte forhold til faren, og korleis faren sine alkoholproblem slit den vesle familien i sund.
Nøgd regissør
– Hurra, utbrøyt ein smilande regissør Arild Andresen til NTB laurdag kveld.
Ein tydeleg nøgd regissør som seier at prisen kom heilt uventa.
– Eg kan ikkje gå rundt og forvente ein slik pris. Men eg står veldig inne for filmen. Eg er stolt av filmen, ikkje minst av skodespelarprestasjonane, seier Andresen.
- LES OGSÅ:
Den norske filmen vart synt fram på filmfestivalen førre helg. Då var reaksjonane stort sett positive.
– Me har hatt fleire testvisningar, og det er alltid nokon som kjenner seg meir att i temaet enn andre, sa regissør Arild Andresen om filmen.
I hovudrollene i filmen finn me Kristoffer Joner, som speler Terje Orheim, og Vebjørn Enger i rolla som Jarle Klepp.
Fortel om ein familie i krise
Juryen begrunna prisutdelinga med at «Kompani Orheim» er ein film som fortel om ein familie som lid under faren sin brutalitet.
– Me trur at dette har vore, og framleis er, den fryktelege erfaringa mange barn gjer seg, å bli moralsk, psykisk og til og med fysisk mishandla av faren sin. Utan å få noko hjelp av mora si.
Den gjeve filmprisen er på 1 million svenske kroner.