ALS-sjuke Heidi Pfützner frå Tyskland har mista all muskelkraft og er avhengig av maskiner for å kunne trekkje pusten.
Likevel er ho i stand til å lage sine eigne måleri, ved å styre ein digital pensel med hjernen. Dette skriv Telegraph.
Det er forskarar og teknologar ved Universität Würzburg og teknologibedrifta gTech som saman har utvikla hjerne-datamaskin-grensesnittet BrainPainting som gjer ALS-sjuke i stand til å bruke sine kreative evner igjen.
- Les også:
Hette måler hjerneaktivitet
BrainPainting går ut på å registrere hjerneaktivitet hos ein brukar ved hjelp av ei hette med elektrodar, og omsetje dette til fargar og former
Når brukaren konsentrerer seg om ein av fleire ulike val, som å teikne ei linje eller velje ein farge, kan programvara fange opp kva brukaren vil gjere via elektrodane.
Dette skjer konkret ved at kvar valmoglegheit blinkar, og brukaren må telje kvar gong den valmoglegheita dei ønskjer blinkar.
Programvara kan bruke teljinga til å finne ut kva valmoglegheit brukaren konsentrerte seg om.
- Les også:
– ALS er ikkje slutten
Heidi Pfützner fekk sjukdommen Amyotrofisk lateralsklerose (ALS) i 2007. Sjukdommen angrip motoriske nerveceller i ryggmargen og hjernen, slik at pasienten til slutt blir paralysert. Det finst inga behandling for ALS, og statistisk sett overlever pasientar berre tre år etter at dei får diagnosen.
Saman med familien bestemte Heidi seg for å leve vidare med hjelp av pustemaskin.
Før Heidi Pfützner vart sjuk, var ho ikkje særleg glad i teknisk utstyr, og kunne ikkje fordra å jobbe med datamaskiner.
Men teknologi som bind saman hjerne og datamaskin, såkalla brain-machine-interface, har no gitt henne moglegheit til å ta opp delar av sitt gamle liv på nytt.
– Dette prosjektet gir meg moglegheita til å vise at ALS ikkje har betydd slutten på livet mitt, skriv Pfützner i ein blogg på nettstaden Startnext.
Firebarnsmora har brukt teknologien til å lage ein serie av digitale hjernemåleri som ho skal stille ut på øya Easdale i Skotland i juli i år.