- Iesj gålmån biejven fálaldagáv åttjudiv. Gåhttjum lav Bådådjo Suohkanav dalága diededit jus huoman e nagá åhpadimev fáladit, jus ij de ietjam dåjmav jåhtuj biejav.
Dav javllá Amund Eriksen guhti la æjgát oahppáj gesi guokta máno skåvllåálgo maŋŋela vilá ij fáladuvá giellaåhpadibme julevsámegielan.
• Lågå aj:
Fálaldahka gárves
Bådådjo suohkanin le åvdåsvásstádus guhkásåhpadimefálaldagás julevsámegielan oahppijda gev e nagá åhpadit bájkálasj åhpadiddjijn dan suohkanin gånnå årru. Bierjjedahkaj ij lim Bådådjo Suohkan tjoavdos dilláj.
Tor Egil Kvalnes Bådådjo Luondoskåvlås Bådådjo Suohkanin.
Foto: Fotograf Tor Egil Kvalnes / kval / Bodø kommune– Niellja oahppe sihti julevsámegielav ja gejda ij fáladuvá sijá suohkanis, valla ep nagá åhpadiddjijt oadtjot, javlaj Bådådjo Luondoskåvlå rektor Bådådjo Suohkanin Tor Egil Kvalnes bierjjedagá.
Valla ájllegin gávnnin tjoavddusav
– Riek gássjel la gávnnat åhpadiddjijt guhkásåhpadibmáj julevsámegielan, dajna lip ålov rahtjam. Valla dálla lip guorrasam dågålasj åhpadiddjijn, ja lip diedov vaddám suohkanij ja æjgádijda mij lip dal fálaldagáv gárvedam.
– Suohkanij la alvos juorre gå galggap åhpaduslágav tjuovvot valla ep nagá fállat dav åhpadusáv masi la siján riektá. Gå nahkap fálaldagáv vaddet de dát mijáv giehpet, javllá Kvalnes.
Fálaldagáv iesj åttjudij gålmån biejven
Eriksen huoman tjoavddusav vuorddá.
– Iv diede jus ássje l tjoavdedum. Oadtjum lav mejlav mij ij la nav tjielgas. Danna tjuodtju mån budáv oattjov dijstagá, dalloj galggi tjadádit maŋemus sjiehtadusájt åhpadiddjijn.
– Jus Bådådjo Suohkan vuorbástuvvá åhpadimijn fáladit de galggap sijá fálaldagáv adnet dáv jagev. Valla sæmmi båttå lav mejlav rádjam Fylkkamánnáj gånnå tsuojggiv muhtem ássjijt ja gånnå tjuottjodav dát ij la dåhkkidahtte dille. Boahtte skåvllåjages de viertti liehket nanos tjoavdos, ep máhte návti gihkadit.
Duojkke
Gássjelisvuoda guhkásåhpadimijn la juojddá mij la læhkám moadda jage. Amund Eriksen vierttij avta jage priváhta åhpadiddjev lájggit åhpadittjat suv mánáv.
– Æjgáda e desti visjá ádnot sámegielav ietjasa mánájda. Diehti le duojkke ja iehpetjielgas dille. Ruvva ælla desti máná gudi sávvi guhkásåhpadimev, sjuohket Eriksen.
