PÅ NORSK:
(Muitaleaddji: Isak Samuel Hætta)
Dás dohko meara guvlui gávdno báiki, man namma lea Riebangohppi. Ja rieban lea ge leamaš dovddus máinnasealli. Gávvil ja juonalaš go lei, de son dájuhii sihke olbmuid ja mehciid eará ealibiid. Dá okta máinnas maid rieban barggai:
Rieban vuovdá guovžžadávttiid: De leigga rieban ja guovža ovttasajes bivdime. Rieban váldá áimmolaččaid firpmiin guliid ja de boahtá guovžža lusa.
Guovža jearrá:
- Gos don dieid guliid leat ožžon?
Rieban vástida ahte áimmolaččaid čáhcegáldus son lea daid ožžon. Guovža jearrá:
- Mot don leat daid ožžon?
- Na, buolašija son bijai áimmolaččaid čáhcegáldui seaibbi, iige váldán ovdalgo iđđedis dan seaibbis eret.
Guovža dadjá:
- Oahpis mu nai dan čáhcegáldu lusa! De rieban oahpistii ja gohčui guovžža bidjat seaibbis čáhcegáldui.
Iđitbeallái ija dadjá rieban:
- Guldalatta, orrot go darváneame?
Guovža bajida veahá, lossat dieđusge lea go seaibi lea galbmon jikŋii. Guovža doaivu guolit dat leat ja dadjá riebanii:
- Orrot gal darvánan, lossat lea goit.
De šattai iđit ja olbmot lihkkagohte. De riemai rieban čuorvut:
- Áibmolaččat! Bohtet bissuid sáittiiguin! Guovža gožžá, baiká din čáhcegáldui.
De guovža suorganii, gaikkihii seaibbis gaskat, seaibelahkki bázii gáldui. Guovža suhtai máđoheamet ja vulggii riebana doarrádallat. Rieban ruohtai beahceguddo vuollái ovdalgo jovssahalai. De riemai guovža gaikut ruohttasiid. Go guovža ii deaivva roggat guddo, de rieban biehku:
- Vuoi, vuoi go bávččagahttá mu! Ja go guovža deaivá gaikut riebana, de rieban dadjá:
- Áddjá gaiku dušše ruohttasiid!
De guovža heaitá dakko ja roggagoahtá ruohttasiid. De rieban vuot biehkugoahtá:
- Ále ádjážan gaikko.
Ja guovža riepmá bahábut gaikut daid ruohttasiid. Muhto goitge oaččui guovža riebana njálbmái ja vuolggahii dan borransadjái.
De dadjá rieban:
- Buorebuš áiggážat, beaivvit mus dalle ledje go mon duoid baikalottiid girjjogárjjohallen.
Guovža jearrá riebanis, ii go so nai áiggo nu girjjogárjjohallat?
Rieban dadjá:
- Áiggun mun gal, juos gierddat.
Guovža dadjá:
- Mii dat lea sutnje, go juo duot baikalottážat leat gierdan!
De luittii guovža riebana, ja de gávnnaiga soai sápmelačča luovi. Rieban sihtá guovžža botnjat gassa bessodagaid ja čoaggit muoraid luovi vuollái. De galgá guovža čatnat iežas luovi ala bessodagaiguin. Guovža čanai. Rieban dagai dola. De guovža riemai biehkut báhkasin go buolligođii.
Rieban dadjá:
- Gierddahala, gierddahala, ádjážan!
Guovža dadjá:
- Báhkas be lea.
De dat rieban bolddii dan guovžža.
Rieban válddii seahka ja cokkai guovžža dávttiid dohko. Bođii muhtun badjeolbmá lusa, gii lei láideme heargeráiddu. Olmmái jearrá riebanis:
-Mii du seahkas lea?
Rieban vástida:
- Áhči ja eatni árbedávvir.
Ja jearrá ii go olmmái vuovdde sutnje heargeráiddu dan seahka ovddas? De olmmái vuvddii.
Rieban dajai:
- It galgga fal geahččat mii seahka siste lea ovdalgo viđa guđa váráš duohkái leat beassan.
De rieban vulggii heargeráidduin ja manai meahccái ja čohkkii buot meahcielliid alccesis njuovvanveahkkin. Sii ripme málestit, ja go mális lei giksagoahtán, de manai rieban alla dievá ala váccašit. De čuorvugođii fáhkkestaga:
- Áibmolaččat, bohtet bissuid, sáittiiguin. Barget heaggaseattet!
De riebana veahkit balláje visot, muhtumat ruhtte báđi vuole, ja giebahuvve bealjegeažit njoammilis, buoidagis čáhpode seaibegeahči. Ja de rieban ieš borai visot dan maid lei ožžon.