Mathangi Arulpragasam kom til Storbritannia frå Sri Lanka som 11-åring. Ho som slo gjennom under artistnamnet M.I.A. med nyskapande dansemusikk i 2005.
Faren hennar var tamilsk aktivist, og sidan gjennombrotet som artist, har M.I.A. synt eit sterkt engasjement for konflikta mellom minoriteten og singalesiske styresmakter.
Medan geriljakrigen har auka i intensitet, har ho snakka om saka i mediene fleire gongar - men nektar for at ho gjev støtte til terroristar.
- Kampen mot undertrykkjing starta lenge før tamiltigrane vart etablert. Dei har gjort kampen meir berømt, seier ho i tv-programmet til amerikanske Bill Maher.
I tillegg tvitrar ho nesten dagleg om at vi alle må gjere noko for internerte tamilar. Den siste oppfordringa hennar er å boikotte Hennes & Mauritz og andre som produserer og sel klede billeg til Vesten.
- Kan påverke mykje
Tamilske Majoran Vivekananthan er redaktør i avisa Utrop. Han rosar den britiske artisten for å lage sin eigen informasjonskampanje.
- Vi har ei historisk mogelegheit til å avslutte dei etniske spaningane. Og det er no, om ein legg internasjonalt press på aktørane, ein kanskje kan få til noko. Og i USA kan faktisk M.I.A. oppnå ganske mykje, gjennom å få taletid på tv-program som Oprah, som har mykje påverknadskraft.
- Kan verkeleg ei lita rappejente frå Storbritannia påverke storpolitikken?
- Til ei viss grad kan ho rette merksemd mot problematikken gjennom tv-show ho er med på i USA. Nokon av programleiarane som intervjuar henne har knapt høyrt om konflikta.
- M.I.A. er ei trøst
Majoran Vivekananthan, redaktør i Utrop.
Foto: Dang Trinh / NRKVivekananthan ønskjer eit liknande engasjement fra fleire, men ser at det først og fremst er utflytta tamilar som sprer informasjon om sine eigne - også i Noreg.
- Mange tamiler ser opp til M.I.A. som eit viktig førebilete. Og når ho kom med støtteerklaringar og sette i gong aksjonar i ei vanskeleg tid, blei det veldig godt motteke av tamilane. Dei følte at det i det minste var nokon som gjorde noko - og det var ei trøyst for mange.
