Skal dette skje må det ei svært langvarig krise til, trur sjefen for Island Offshore i Ulstein. Reiarlaget har tre skip med slik avtale, og presset mot denne ordninga har forsterka seg den siste tida.
- Les også:
– Eg trur det er veldig vanskeleg å få den fjerna. Det kjem til å krevje enorm politisk vilje, seier Island Offshore-sjef Håvard Ulstein.
Det er leiaren i reiarlaget REM Offshore i Herøy, Åge Remøy, ueinig i. Dei har ingen båtar med slike riggavtalar. Remøy trur ikkje næringa kan leve med ordninga på sikt.
– I forhold til konkurrentane våre er dette ein tapssituasjon. Vi er åleine i verda med ei slik ordning – og det er mykje dyrare enn å drive som konkurrentane.
– Kor realistisk er det å få fjerna ordninga?
– Det vil vere frykteleg vanskeleg å ta tak i, men eg trur det vil vere vanskeleg også å halde fram med denne skiftordninga, seier Remøy.
– Urealistisk
Direktøren i Island Offshore har meir enn nok å henge fingrane i. Offshorereiarlaget hadde eit rekordår i fjor, men slik vert det ikkje i år med dagens oljepris. Ei skiftordning der mannskapet arbeider to veker og har fri i fire er vanleg i oljenæringa. Sjølv om dette kostar kundane ekstra, trur ikkje Ulstein at ordninga forsvinn med det første.
– Vi har 250 tilsette i vårt reiarlag som har denne ordninga, og det har gått greitt så langt, seier Ulstein.
Ulstein trur det er urealistisk å tenkje at ordninga kjem til å forsvinne. Han ønskjer ikkje å kommentere kva han sjølv syns om skiftordninga som dei no har brukt i ni år.