Det blei nokså snart sett i gang søk etter mannen, som politiet frykta skulle ligge skadd i terrenget. Motorsykkelen fann politiet nokså raskt.
Operasjonsleiar Siri Engdahl fortel at både politi med hund, brannvesen, ambulanse, Luftambulanse, Redningsskøyte, Røde Kors og Norsk Folkehjelp har søkt i området.
Dei ber også dei som bur i området om å sjekke hus, hytter, naust og uthus og føraren av motorsykkelen skal vere der.
Stor leiteaksjon
Då motorsykkelen køyrde ut i terrenget var den på veg vestover frå Molde, på fylkesveg 662.
– Vedkomande er sporlaust forsvunne, seier Engdahl, som fortel at andre køyretøy ikkje var innblanda i hendinga.
Tidleg søndag føremiddag var Norsk Folkehjelp, Røde Kors og politiet framleis i gang med leitinga, men i 11-tida blei den avslutta utan resultat. I staden blir etterforskinga trappa opp, opplyser politiet.
Dei har ingen teori om kvifor motorsyklisten har forsvunne. Dei veit kven eigaren av sykkelen er, ein mann i 40-åra frå Molde, men ikkje om det var han som køyrde i natt.
Har fått kontakt
Søndag kveld seier politiet at dei har fått kontakt med eigaren av motorsykkelen. Han blir søndag kveld avhøyrt på Molde politistasjon.
– Han sit no i avhøyr, fortel operasjonsleiar Frode Gjøsund, like etter klokka 22.00.
