– Vi vil ha respekt og meir pengar

Mange utlendingar er skeptiske til å organisere seg, men i løpet av kort tid har 200 av dei 300 tilsette hos Kleven Maritime Contracting meldt seg inn i Fellesforbundet.

• Les også: – Imponert over unge som tek fagutdanning til svært avansert arbeid

Redde for organisering

Klubbleiar Viorel Ilescu har allereie lært seg fagforeiningsspråket og seier at dei vil ha respekt og pengar. Det spesielle er at alle tilsette er utlendingar. Mange av dei har tradisjonelt vore redde for at organisering skulle føre til at dei misser arbeidet, og Illescu seier at han prøver å overtyde flest mogleg om at fagorganisering kan gje dei eit betre liv.

– Vi har organisert oss for å få meir pengar og for at arbeidarane skal få det betre, seier Ilescu som ønskjer seg ei sikrare framtid.

Han trur ikkje at alle dei utanlandske tilsette vil organisere seg.

– Enkelte jobbar her berre i nokre få månader, og vil difor ikkje vere med. Andre er redde for at dei skal få sparken. Men vi håper at fleire vil vere med, seier klubbleiaren.

Håper på dominoeffekt

Administerarande direktør i Kleven, Ståle Rasmussen, seier at konsernet ønsker tariffavtalen velkomen.

– Det er fri organisering i Noreg, og vi trur på samarbeidsmodellen mellom tilsette og arbeidsgjevarar. Orden og system i arbeidslivet er viktig, kommenterar han.

• Les også: Rekordomsetning for Kleven

Hovudtillitsvald Olav Høydalsvik trur den massive organiseringa blant utanlandske tilsette på Kleven kan bety mykje for mange.

– Det er viktig at dei får det til på ein god måte slik at det kan påverke andre firma med utanlandske tilsette. Det beste som kan skje er at vi også får eit organisert arbeidsliv blant dei utanlandske tilsette, seier han.

Fagforeiningsveteranen seier at det er svært få bedrifter i Noreg med berre utanlandske tilsette som har organisert seg.

Applaurderer dei organiserte

Fredric H Bjørdal (Ap) sit i arbeids- og sosialkomiteen på Stortinget. Han er svært nøgd med at så mange utenlandske tilsette ved Kleven har organisert seg, og gjev ros til både Fellesforbundet og leiinga ved Kleven.

– Med det store innslaget av arbeidsinnvandrarar vi ser i bransjar som industri, bygg og anlegg, har eg vore uroa for at organisasjonsgraden skal gå ned. Dei har ikkje same kulturen for å vere med i fagforeiningar. Her har Fellesforbundet gjort ein viktig jobb. No kan arbeidarane krevje tariffavtale og betre løns- og arbeidsvilkår, og eg vonar fleire med dei ser verdien av å vere fagorganisert, seier Bjørdal.

Sjølv om lågare lønningar for å spare personalkostnader kan verke freistande, kan det svekke konkurransefortrinn på sikt, meiner stortingsrepresentanten.

– Sjølvstendige, myndiggjorte arbeidarar og eit forhold til sjefen som er prega av gjensidig tillit. Dette er eit adelsmerke ved den norske arbeidslivsmodellen, som gjer at vi er heilt i front på nyskaping, omstillingsevne og innovasjon. I framtida trur eg det vil vere endå viktigare enn å konkurrere på pris, noko vi uansett aldri vil greie, kommenterer han.