Søndag held det nyoppretta Danmarks Underholdningsorkester sin første konsert som uavhengig ensemble i København – ein støttekonsert til inntekt for vidare drift av orkesteret utanfor Danmarks Radio.
Nedlagt midt i sesongen
Dei tilsette i orkesteret fekk sjokkbeskjeden i september sist haust: Orkesteret skulle leggast ned frå 1. januar 2015, som ein del av innsparingstiltak i DR. Eit fleirtal i Folketinget gjekk inn for å redde orkesteret, men kulturminister Marianne Jelved sette foten ned for politisk innblanding i DRs tiltak.
I desember vart det lansert ein kampanje på folkefinansieringstenesta Kickstarter. Målet var å samle inn tre millionar til å drive orkesteret vidare. Over 2000 gjevarar gav tilsegn om til saman over éin million, men då aktørar frå næringslivet kom på banen for å dekke inn resten, måtte kampanjen avsluttast sidan Kickstarter har ei øvre beløpsgrense per bidrag. Orkesteret har uansett skaffa seg startkapitalen dei trengde.
– Knallhardt å skaffe sponsorar til kulturtiltak
– Underholdningsorkesteret har eit sterkt varemerke, og det er svært gledeleg at det kan få eit vidare liv, seier Rolf Lennart Stensø, orkestersjef i Kringkastingsorkestret.
– Samstundes veit eg frå tida i Bodø Sinfonietta kor vanskeleg det er å drive eit slikt ensemble utan solid offentleg støtte. Dei innsamla millionane viser det sterke engasjementet for å bevare orkesteret, men det er knallhardt å skaffe sponsorar til kulturtiltak. Vi har ikkje like sterk kultur for slikt i Skandinavia som til dømes i Storbritannia.
Vil opprette prosjektorkester med 40 musikarar
Underholdningsorkesteret har dei siste åra gjort fått merksemd internasjonalt mellom anna for ein video der musikarane et chili og for kritikarroste Mozart-innspelingar.
No er planen å tilsetje ein administrasjon utpå våren. Musikarane kan ikkje rekne med full stilling:
– Vi planlegg å opprette eit prosjektorkester der dei omtrent 40 musikarane har så mykje arbeid i Danmarks Underholdningsorkester at dei ser på det som sin primære jobb, seier Stine Nissen, kommunikasjonsrådgjevar for orkesteret.
– Det vert altså ikkje ein heiltidsjobb, men ein deltidsjobb så omfattande at den har førsteprioritet for musikarane. Det vil truleg bli noko à la sju månader årleg, fordelt over heile året. Men mykje er jo temmeleg usikkert enno.