Med 13 mot seks stemmer vart Fødselskyrkja i dag stemt inn på verdsarvlista av UNESCO. Også pilegrimsruta som er knytt til kyrkja vart tatt opp på den prestisjetunge lista, melder nyheitsbyrået AFP.
Avgjerda vart møtt med stor applaus av den palestinske delegasjonen. Det er deira første nominasjon til lista, etter at dei vart tatt opp som UNESCO-medlem i fjor.
Åtvara UNESCO
Det palestinske sjølvstyreområdet har lenge kjempa for å bli akseptert som medlem i både FN og UNESCO.
Noreg var eit av landa som stemte for medlemskap. Men både USA og Israel har åtvara UNESCO sterkt mot å la palestinarane bli medlem.
Kyrkja er ei av dei eldste i verda, og er bygd over grotta som er blitt utpeikt som fødestaden til Jesus. Den ligg midt i Betlehem, eit område som det har vore stor konflikt knytt til, med tanke på nettopp det palestinske sjølvstyreområdet.
LES:
Gjekk imot komité
Komitéen som kjem med råd til UNESCO, ICOMOS, gjekk imot at kyrkja skulle få verdsarvstatus, ifølgje nettstaden ARTINFO. Dei meinte det ikkje var fare for konserveringa av den og at den ikkje møtte kriteria for opptak.
UNESCO-lista over verdas kultur- og naturarv inneheld meir enn 900 stadar, både kulturstadar og naturområde. 36 bygningar og område blir vurdert for opptak i år, under møtet i St. Petersburg som varer fram til 6. juli.