Tre norske videojournalistar har følgt norske soldatar i Meymaneh, Faryabprovinsen, i eit halvt år.
Dei sit på film av soldatane i kamphandlingar og blei sjølve utsett for angrep under opptak i Afghanistan.
– Dei tre journalistane har alle vore i kampsituasjonar der dei blei skote på av Taliban. Heldigvis var det så langt unna at ingen av dei vart skada, fortel Olav Njaastad, prosjektleiar for «Norge i krig. Oppdrag Afghanistan».
– Tapen rullar og går likevel
Videojournalist Klaus Erik Okstad har vore fire turar til Afghanistan det siste halvåret. Han var med dei norske styrkane då dei vart angripne midt på natta.
– Vi var førebudd på at det kunne skje, så eg hadde kameraet klart. Det tok ikkje lang tid frå dei byrja å skyte på oss til kameraet byrja å gå, fortel han om opplevinga.
– Vi går sjølvsagt i dekning når vi blir bedt om det, men tapen rullar og går likevel. Akkurat då var eg i den situasjonen at eg kunne gjere det. Kulene gjekk ikkje rett forbi meg, forklarar Okstad.
– Ei tikkande bombe
Men det var reisene rundt om i landet, med dei underliggjande farene om vegbomber og liknande, som han tenkte mest på.
– Frykta for å bli ramma av vegbomber var verst. Det var jo fleire folk som omkom av slike bomber i tidsperiodane vi var der. Vi køyrde på vegar som er veldig uoversiktlege. Det var som å sitte på ei tikkande bombe, rett og slett, seier han.
Til saman følgde dei tre videojournalistane soldatane i nesten 30 veker.
- Les også:
Filma soldatar i kamp
NRK gjorde ein avtale med Forsvaret om at dei kunne filme det dei ønskte, bortsett frå ved sikkerheitsmessige unntak.
Okstad meiner dei stod fritt nok til å kunne skildre det dei norske styrkane stod framfor av hinder i Afghanistan.
– Kva etiske vurderingar gjorde de rundt det å filme norske soldatar i kamphandlingar?
– Vi filma ingen som ikkje var villige til å la seg filme i ein slik situasjon. Soldatane var innforstått med at dersom vi skulle skildre konflikta, så måtte vi filme kamphandlingane også, svarer Okstad.
Soldatane har fått sjå TV-serien i ettertid, men har ikkje hatt nokon redigeringsrett, hevdar han.
Viser demokrati-hindera
Serien skal gje innblikk i det som er hovudprosjektet til dei norske styrkane i Afghanistan: Å skape sikkerheit og gje grunnlag for den demokratiske utviklinga i landet. Den viser også hindera som ligg i vegen for denne utviklinga.
– Kor sterke bilete vil TV-sjåarane få heim i stova?
– Vi viser kamphandlingar, men ingen nær-kamphandlingar, svarer prosjektleiar Olav Njaastad.
«Norge i krig. Oppdrag Afghanistan» har premiere på NRK1 25. april klokka 22.15. Dei neste fem episodene vil deretter bli sendt på NRK1 måndagar klokka 21.30.