Tenåringen Rebecca Black blei kjent over natta då ho la ut songen «Friday» på YouTube for ein månad sidan.
Ho kan takke ivrige bloggarar og komikarar for den store merksemda. Låta har nemleg blitt parodiert tallause gongar, og hatet mot songen er mildt sagt stort på nettet.
Men videoen er sett av heile 33 millionar på YouTube, og klatrar no på Itunes singleliste. Denne veka er «Friday» på 25. plass, fire plassar over Justin Bieber og hans hit «Never Say Never».
– Eit nytt nivå av dårleg
Bloggarar over heile verda irriterer seg over den nye tenåringsstjerna. Av dei 33 millionane som har sett YouTube-videoen har 243.955 tatt seg bryet med å trykkje på knappen «Likar ikkje». Knappe 28.655 har trykt «Likar».
Spesielt er det teksten som har sett sinna i kok.
– Eit heilt nytt nivå av dårleg. Black blir ikkje den nye Miley Cyrus, men ho kan ha ei framtid som komikar, kommenterer Time Magazine.
Dei hatske kommentarane vart så mange at plateselskapet til Black, Los Angeles-baserte Ark Music Factory, tilbaud seg å fjerne videoen frå nettstaden. Men Black nekta å gje «hatarane» den gleda, ifølgje The Telegraph.
Bob Dylan-parodi
Det ligg fleire parodiar av songen ute på YouTube.
Blant anna har nokon lagt ut ein song med ei stemme som minner om Bob Dylan. Men teksten er langt frå dylansk.
Skaper nye Bieber-stjerner
Plateselskapet Ark Music Factory har spesialisert seg på å finne unge songarar i alderen 13 til 17 år. Dei spelar inn ferdigskrivne låtar i studio, og så blir videoane lagt ut på YouTube i håp om å skape nye Justin Bieber-stjerner.
No har plateselskapet nådd målet sitt.
«Med dette har dei fått sin første hit, og vi håpar det blir deira siste», skriv nettstaden Yahoo, som kallar «Friday» verdas verste song.
På nettstaden til Ark Music Factory får ein møte jenta som får skulda for å ha introdusert plateselskapet for Rebecca Black, Alana Lee.
Kanskje blir ho deira neste YouTube-stjerne?
Les heile «Friday»-teksten her.