Dame Joan Sutherland døydde søndag kveld, 83 år gammal, opplyser familien måndag. Ho døydde i sin eigen heim i Sveits, etter lang tids sjukdom.
– Ho var ein karismatisk person, ein ekstraordinær viritous, ein myte, ei stor Dame innan operaen, seier Tobias Richter, sjef for Geneve Grand Theatre til AFP.
Tidlegare operasjef Bjørn Simensen sat for nokre år sidan i juryen til Dronning Sonjas Internasjonale Musikkonkurranse saman med Dame Joan Sutherland.
– Ho hadde ein perfekt vokal, som ein knapt har høyrt maken til, seier Simensen.
Dame Joan Sutherland vart fødd i Sydney 7. november 1926, og debuterte på operascena i Australia mot slutten av 1940-åra. Få år seinare gjorde ho store roller på dei europeiske opera-scenene. Ho spelte også inn dei viktigaste sopran-rollene, til dømes Violetta i La Traviata og Gilda i Rigoletto.
– Det som var spesielt at ho prega repertoaret, særleg frå 1959, det er uvanleg at ein pregar operascena i så mange år, seier Simensen.
Sutherland vart sett på som ein revitaliserar av den italienske «bel canto»-tradisjonen i lag med Maria Callas. I løpet av karrieren song ho med fleire store stjerner i hennar tid, mellom anna Placido Domingo, Maria Callas og Luciano Pavarotti.
– Joan Sutherland har århundrets største stemme, sa Pavarotti ein gong om henne.
I 1979 vart ho adla til Dame Joan Sutherland. Ho avslutta karrieren som operasongar for 20 år sidan, med ein serie framsyningar i Sydney Opera House.
– Etter hennar eige ynske vert gravferda lita og privat, opplyser familien.