Suosat
Suossa lea go jogas muohta darvána bodnái dahje čáhci suossá bodnái. Dat ráhkada bodnesuosa, erenoamážit guoikajogas dahje rávnnjis. Ja nu bođastage joga, dat báddá bajás, šaddá bođasjohka dahje bođasčáhci.
Suosat leat maiddái diet mat golget jogas dán muttus jagi. Muitaluvvo ahte dat luovvanit botnis, šaddet baldun, suossabaldun. Dasto de čatná joga.
Suosat maid šaddet go čáhci bajil galbmo, spildu, ja beaivvi ala veahá nálge. Dalle suddá dan muddui dat veahá jiekŋa ahte vuolgá. Dalle golgagohtet suosat, ja nu šaddáge suossajohka.
Roavku
Go de bivaldišgoahtá giđa beallái, de suossa suddagoahtá botnis. Dalle johka roavkuluvvá, šaddá roavkun. Go johka gahččá, dalle dábálaččat báhcá jiekŋa guovttebeale gáttiide, geđggiid ala.
Gáldut: Nils Turi, Anders Johnsen, NRK SR dálketearbmajoavku ja Konrad Nielsena sátnegirjjit.