- Også palestinske grupper braut folkeretten under Gaza-krigen

Dei militante gruppene på Gazastripa braut folkeretten med angrepa sine mot israelske sivile under krigen i november, seier menneskerettsorganisasjonen Human Rights Watch i ein rapport.

Rakett fra Gazastripen

Det vart skote 1500 rakettar frå Gazastripa mot Israel under konflikten i november.

Foto: AMIR COHEN / Reuters

Den New York-baserte organisasjonen HRW kritiserte sist veke Israel for å ha brote folkeretten i konflikten. Dermed meiner organisasjonen at begge partar braut reglane i Genève-konvensjonen under krigshandlingane frå 14.–21. november.

Det vart inngått våpenkvile 21. november etter intens mekling blant andre frå Egypt.

– Sivile var mål

ISRAEL-PALESTINIAN-GAZA-CONFLICT

Både Israel og dei palestinske gruppene braut folkeretten under krigen i november, slår Human Rights Watch fast.

Foto: JACK GUEZ / Afp

Den israelske hæren har opplyst at det vart skote 1500 rakettar frå Gazastripa inn i Israel i denne perioden. Sarah Leah Whitson i Human Rights Watch peikar på at dei væpna palestinske gruppene heile tida gjorde det klart at sivile israelarar var mål for angrepa.

– Det er rett og slett ikkje mogleg å rettferdiggjere å skyte rakettar mot sivile bustadområde, seier Whitson.

Ho seier også at dei væpna gruppene sette liva til sivile palestinarar i fare ved å skyte rakettar ut frå tettbygde område, fordi ein då må rekne med motangrep.

Rapporten fortel om rakettar som vart skotne ut frå hotell, forretningslokale og nær private heimar.

Hamas avviser kritikken

Den islamistiske organisasjonen Hamas, som styrer Gazastripa, avviser kritikken frå Human Rights Watch. Talsmann Sami Abu Zuhri seier at rapporten er feil fordi han sidestiller ei atommakt sin aggresjon mot sivile og eit okkupert folk, med dei som berre forsvarar seg mot israelsk aggresjon.

Ahmed al-Jaabari er drepen i eit israelsk luftangrep.

Ahmed al-Jaabari, den militære leiaren i Hamas, vart drepen i starten av den israelske militæraksjonen i november.

Foto: HANDOUT / Reuters

170 palestinarar, mange av dei sivile, vart drepne under kamphandlingane i november, medan seks menneske, fire sivile og to soldatar, vart drepne på israelsk side.

Internasjonale lover

Israel har svart på kritikken frå Human Rights Watch med at dei heile tida har prøvd å følgje internasjonale lover når det gjeld krigføring, trass i at terrororganisasjonar over lang tid har brote alle slike reglar.

Det israelske angrepet mot Gazastripa starta 14. november med drapet på leiaren for den væpna greina av Hamas, Ahmed al-Jaabari. Dette skjedde etter at det var over ein lang periode var skote rakettar frå Gazastripa mot sivile område i Israel.

LES OGSÅ: Derfor sitter vi igjen med et falskt bilde av Israel

LES OGSÅ: Verden sett fra Gaza

LES OGSÅ: Feiret våpenhvilen som en seier

SISTE NYTT

Siste nytt