Politiet aksjonerte mot den katalanske regjeringa i Barcelona

Dette skjer etter at det nasjonale politiet i dag arresterte 13 personar knytte til den katalanske regjeringa, blant dei Josep Maria Jove. Han er ansvarleg for den økonomiske politikken i regionen og rekna som den høgre handa til visepresident Oriol Junquares.

Politiaksjonen er knytt til den planlagde folkerøystinga om sjølvstende for Catalonia 1. oktober. Sentralstyresmaktene i Madrid har stempla folkerøystinga som i strid med den spanske grunnlova og gitt ordre til alle ordførarane i regionen om ikkje å leggje til rette for det.

Politiet opplyser at dei har teke beslag i fleire millionar røystesetlar, som skulle brukast i folkerøystinga.

– Unntakstilstand

Den katalanske leiaren Carles Puigdemont skuldar dei spanske styresmaktene i realiteten har innført unntakstilstand i regionen og oppheva sjølvstyret. Han viser blant anna til at Madrid har lagt restriksjonar på den katalanske økonomien.

– Dei har gått til angrep på institusjonane våre og på folket vårt. Vi kjem ikkje til å godta det, sa han i føremiddag. Han kalla straks inn regjeringa si til krisemøte, og i ein fjernsynstale i føremiddag oppmoda han katalanarane om å møte mannjamt opp og røyste i folkerøystinga 1. oktober.

Han gjer det klart at den planlagde folkerøystinga vil bli bindande, same kor stor deltaking det blir. Han vil heller ikkje bry seg om at dei sentrale styresmaktene i Madrid har stempla folkerøystinga som ulovleg.

Ordføraren i Barcelona, Ada Colau, kalla politiaksjonen mot den katalanske regjeringslokala og arrestasjonane for ein skandale.

Catalonias president: Alt er klart for folkeavstemning

Skjebneval for Catalonia

– Demokratisk skandale

– Det er ein demokratisk skandale aksjonere mot offentlege institusjonar og arresterte offentlege tenestemenn av politiske årsaker. Vi vil forsvare dei katalanske institusjonane, seier ho.

Det nasjonale politiet aksjonerte i dag tidleg mot ni katalanske regjeringskontor i Barcelona, inkludert Palau de la Generalitet, kontoret til statsministeren, Finans- og arbeidsdepartementet.

Etter at aksjonen mot regjeringskontora og arrestasjonane vart kjende, samla fleire hundre demonstrantar seg utanfor bygningane med katalanske flagg og plakatar med krav om sjølvstende.

Mange demonstrantar marsjerte også nedover hovudgata La Rambla og ropte «Vi vil røyste» og «Sjølvstende», ifølgje El Pais.

Det nasjonale politiet stadfestar i ei fråsegn at dei har gjennomført ein aksjon i Barcelona i samband med den planlagde, ulovlege folkerøystinga 1. oktober.

Full konfrontasjon mellom Madrid og Barcelona

Pep Guardiola til val for eit sjølvstendig Catalonia

Kraftige samanstøytar

Det var kraftige samanstøytar mellom demonstrantar og politi utanfor regjeringsbygningen då ein av dei arresterte vart køyrt bort. Demonstrantane prøvde å hindre bilen med arrestanten i å kome seg forbi.

Forholdet mellom Madrid og Barcelona er det dårlegaste på lang tid. Spanias statsminister Mariano Rajoy sa i nasjonalforsamlinga Cortes i Madrid i dag at aksjonen mot den katalanske regjeringa vart gjennomført i tråd med spansk lov.

Parlamentsmedlemer frå Catalonia forlèt då salen i protest, ifølgje El Pais.

Eit anna teikn på ein stadig meir tilspissa situasjon er at det spanske innanriksdepartementet har trekt tilbake alle permisjonar for den delen av Guardia Civil og det nasjonale politiet som har fått ordre om å stanse den planlagde folkerøystinga om sjølvstende for Catalonia.

Marsjerer for Catalonias «nye framtid»