Kjelder tett på presidentkampanjen til Gingrich har stadfesta at Donald Trump kjem til å gi si støtte til Newt Gingrich på ein pressekonferanse i ettermiddag, skriv den britiske avisa Daily Mail.
Annonseringa kjem i tilfelle to dagar før nominasjonsmøtet til republikanarane i delstaten Nevada. Ein talsmann for kampanjen til Gingrich vil førebels ikkje kommentera opplysningane.
Les også:
I fjor flørta forretningsmannen Donald Trump sjølv med tanken om å stilla som presidentkandidat for republikanarane, men blei latterleggjort etter utspel om at president Barack Obama kanskje ikkje var fødd i USA.
Trump forlot det republikanske partiet i desember.
Kvinnene unngår Gingrich
Kampen om å bli republikansk presidentkandidat står no i hovudsak mellom Newt Gingrich og Mitt Romney.
Sistnemnde vann med solid margin over sin konservative rival i nominasjonsvalet i delstaten Florida denne veka. Romney fekk 46 prosent av røystene, medan Gingrich enda opp med 32 prosent.
- Les også:
- Interaktiv grafikk:
Særleg er det kvinnene som unngår Gingrich. Berre 28 prosent av kvinnene røysta på 68-åringen, som er blitt råka av ei rekkje uheldige historier i valkampen. Gingrich er skilt to gonger, og har vedgått utruskap.
Han hadde ein affære med ein sekretær i kongressen medan han som leiar av representanthuset pressa på i skuldingane mot dåverande president Bill Clinton, som laug om sitt forhold til Monica Lewinsky.
Hans første kone har hevda at Gingrich bad om skilsmisse medan ho låg på sjukehus og kjempa mot kreft.
Samstundes har den andre kona hans sagt at Gingrich ville ha eit ope ekteskap slik at han kunne halda fram med å vera utru. Denne skuldinga har Gingrich hardbarka nekta for.
Les også:
Ei spørjeundersøking i avisa Wall Street Journal viser at 57 prosent av republikanske kvinner over 50 år har eit negativt syn på Newt Gingrich.
Les også:
Bachmann nektar for Romney-støtte
Samstundes med spekulasjonane om at Gingrich no får støtte frå Donald Trump, nektar den tidlegare presidentkandidaten Michele Bachmann for at ho vil gi si støtte til Mitt Romney.
Avisa Boston Globe skreiv tidlegare denne veka at Romney var i samtalar med Bachmann, men dette blei altså avvist av støttespelarane til Bachmann i ei utsegn i går.
Les også:
Bachmann var kandidat i den republikanske nominasjonen til presidentvalet, men trekte seg 4. januar, dagen etter at republikanarane hadde sitt nominasjonsmøte i delstaten Iowa.
Ho har tidlegare sagt til Fox News at ho vil gi si støtteerklæring til ein av dei andre kandidatane før 7. februar.