Reineigar tapte i lagmannsretten – må sone i fengsel etter bjørnedrap

Reineigaren som skaut tre bjørnar i Lierne i mai i fjor, må likevel sone i fengsel.

I Trøndelag tingrett ville aktor at tiltalte skulle dømast til eit års fengsel. Tingretten landa på vilkårsbunde fengsel i åtte månader med ei prøvetid på to år.

Meinte han skaut i naudverje

Dei tre bjørnane vart skotne i eit område der minst 14 reinsdyrkalvar vart funne døde av Statens naturoppsyn i løpet av få dagar.

Tiltalte fann fleire døde kalvar då han skulle sjå til reinflokken i området.

Han såg bjørnane ligge og ete på reinskrottar og meinte bjørnane kom til å angripe flokken igjen om kort tid.

Han skaut dyra på om lag 30 meters avstand, men forklarte i retten at det var naudverje.

Få dagar før hadde tiltalte fått avslag på søknaden om å få skadefelle dyra.

Bjørnen er totalfreda. Det er berre tillate å skyte bjørn når det er snakk om eit pågåande eller umiddelbart åtak mot til dømes tamrein eller sau.

Aktor, politiadvokat Amund Sand, gjentok i ankesaka påstand om eit års fengsel for tiltalte (50).

Sand sa at tingretten hadde brukt lova rett. Men at straffa på åtte månader i fengsel på vilkår er for mild for alvorleg miljøkriminalitet.

Til liks med tingretten meiner fleirtalet i Frostating lagmannsrett at det ikkje var snakk om naudverje.

Usemje blant lagdomarane

Fleirtalet viser til at det hadde gått ein times tid etter åtaket på reinkalvane då tiltalte skaut bjørnane:

Ein av dei tre lagdomarane meinte det var snakk om eit pågåande åtak på reinflokken sjølv om bjørnane låg og åt då tiltalte skaut dei.

Han burde derfor frifinnast, meinte mindretalet.

Relativt nøye planlagt

«Avlivingen var heller ingen impulshandling, men relativt nøye planlagt.», står det i domen frå lagmannsretten.

Tiltalte bestemte seg for å avlive bjørnane minst tre kvarter før det skjedde.

Ein kollega på post rettleia tiltalte i retning av bjørnane.

To av dei tre dyra var binner. Terskelen for å felle binner med ungar skal vere høg.

Alt dette er skjerpande omstende, meiner retten.

På den andre sida har tiltalte i stor grad vore med på å opplyse saka.

Avlivinga skjedde for å verne om reinkalvane. Tiltalte hadde i dagane før freista å halde bjørnane unna staden der kalvinga gjekk føre seg.

Dette er formildande, og lagmannsretten sette straffa til seks månader i fengsel.

Forsvarer Brynjar Meling opplyser til NRK at domen kjem til å bli anka til Høgsterett.