Sør-Trøndelag tingrett bestemte i ettermiddag at 18-åringen skal sitte i varetekt fram til rettssaka startar 7. januar 2010
– Etterforskinga av drapet i Skaun blir ferdig denne veka, men motivet for ugjerninga er framleis uklart, seier etterforskingsleiar og lensmann i Skaun, Arve Nortvedt til NRK.
Ein månad sidan
Det er i dag ein månad sidan 15 år gamle Oda Moe blei funnen kvelt ved travbana i Børsa i Skaun.
15-åringen kom dit i bil saman med 18-åringen som no er sikta for forsetteleg drap. Han tilstod same natta, etter at han blei arrestert på Oppdal.
Rundt 20 vener, bekjente og andre som kunne ha nyttige opplysingar i saka, er avhøyde i løpet av månaden som er gått.
Uklart motiv
Motivet for drapet er framleis uklart for politiet. Ifølgje obduksjonsrapporten blei 15-åringen ikkje utsett for seksuelle overgrep.
Det næraste ein har kome fram til i dei to avhøyra av den sikta mannen, er at han skal ha hatt eit ønske om å drepe nokon.
Mykje tyder på at jenta difor blei eit tilfeldig offer. Om 18-åringen i staden kan bli tiltalt for overlagt drap, er framleis uvisst.
Undersøkt av rettspsykiatar
Den 18 år gamle mannen har blitt undersøkt av rettspsykiatrar for å finne ut om han var tiltrekneleg.
Sikta har delvis sitte i varetekt i fullstendig isolasjon, etter krav frå politiet. No er det ikkje lenger fare for at bevis kan gå tapt.
