Vurderer å flytte: Barnehagen er for ofte stengd

– Dei største konsekvensane er for ungane. Dei får ikkje dei faste rutinane sine og den føreseielegheita dei fortener. Dei fortener å kunne vite at i dag og i morgon skal eg i barnehagen, seier Kristine Figenschou.

De tre barna hennar går i den lokale barnehagen i bygda Kvalsund i Hammerfest. Men det siste året har Figenschou vore mykje borte frå jobb fordi barnehagen har vore stengd. Ho og mannen må bytte på å vere heime med barna.

Figenschou seier dei er heldige sidan mannen hennar har mykje fri, men det gjeld ikkje alltid.

I desember var 50 prosent av dei tilsette i Kvalsund barnehag sjukemeld.

– Det er utfordrande. Vi får ikkje dratt på jobb og vi er saman med ungane heile tida. Det er kjempefint, men vi merkar på ungane at dei har lyst til å vere i barnehagen. Vi merkar det veldig på ho eldste og ho minste.

Figenschou påpeikar at dei prøver så godt dei kan å gjere ting, men ungane blir ikkje like tømte for energi som dei gjer i barnehagen.

– Det å få lov til å vere saman med andre ungane og dei pedagogiske tinga. Ho eine begynner på skolen neste sommar. Det er den pedagogiske delen som vi ikkje heilt klarer å sjonglere.

Fleire foreldre har òg tatt ut ferie for å vere heime med barna.

Jobbar fire dagar, får betalt for fem

Arve Paulsen, kommunalsjef for oppvekst og kultur i Hammerfest kommune forstår at foreldre og andre barnehagar er fortvilte over kor mykje barnehagane har vore stengde det siste året.

Han forklarer at Kvalsund barnehage no har ein situasjon der ei avdeling er stengd kvar dag på grunn av mangel på personell.

– Det er ein trist situasjon for barna, det er ein trist situasjon for føresette og ikkje minst for dei tilsette som føler at dei ikkje får gjort ein god jobb. Eg skjønar dette utolmodet.

Barnehagen har ikkje nok tilsette, og slit med å få tak i vikarar.

– Lønna her er dårlegare enn for eksempel på butikken. Vi taper i arbeidsmarknaden, seier Una Øien er styrar i Kvalsund barnehage.

No prøver kommunen ein ordning for å lokke til seg fleire tilsette.

Det går ut på at dei tilsette jobbar 80 prosent og får lønn for 100 prosent.

Det vil seie at alle tilsette vil ha ein dag fri per veke.

Paulsen seier det tar tid å rekruttere folk og at dei er nøydde til å ha nok menneske på plass før 80/100 ordninga kan starte.

Vanskeleg

Una Øien i Kvalsund barnehage fortel at dei gler seg mykje over den nye ordninga.

Øien fortel at det har vore mykje sjukefråvær, men det er det også på landsbasis i barnehagane. I tillegg har det også blitt veldig vanskeleg å få tak i vikarar.

– Det er vanskelegare for oss å få tak i vikarar enn dei som er i sentrum. At vi ikkje har bemanning blir lagt merke til fortare.

Då må Øien stenge for å sikre at barna skal ha ei trygg og sikker drift av barnehagen.

– Det er ikkje heldig for dei å jobbe med altfor mange barn under seg og gå med ei dårleg kjensle heile tida.

– Når trur du at denne barnehagen vil ha ei bemanning som gjer at de slepp å stenge avdelinga?

– Eg kan ikkje seie når det skjer. Vi jobbar for at det skal skje fort og det blir jobba på i alle ledd for at vi skal få 100 prosent drift på barnehagen så snart som mogleg.

Øien seier dei er heldige med ei forståingsfull foreldregruppe som stiller opp for dei og hjelper til der dei kan.

– Det er slitsamt å ikkje kunne drifte sånn som vi ønsker, og føle at vi ikkje får det til sånn som vi ønsker, seier Øien.

Roper høgt

Figenschou seier familien ser på det å flytte bort frå Hammerfest kommune og starte ein annan plass, sjølv om det ikkje er det dei eigentleg ønsker.

Dei kan ikkje ta seg så mykje fri frå jobb og det går også utover økonomien til familien. Ho seier dei har fått nok.

– Eg roper høgt no, for eg vil at ungane mine skal kunne få vere i barnehagen og få det opplegget dei har i barnehagen. For det er trygt og godt for dei å få vere i barnehagen og få vere i lag med andre ungane.