Vulle Vuojaš golmma sámegillii

Dán jagi lea Vulle Vuojaš juovlabláđđi sihke davvisámegillii, lullisámegillii ja julevsámegillii.

– Giella dárbbaša buot lágan čállosiid iešguđetge hámiin vai lea ealli giella. Mii leat nu movttegat go Tjalle Tjååtsele lea oassi sámi mánáid giellaárgabeaivvis, dadjá lullisámi Vulle Vuojaš-bláđi jorgaleaddji, Anja Labj.

Dál lea goalmmát geardi go Story House Egmont-lágádus almmuha Disney-buktagiid golmma sámegillii.

Golmmamánáeadni, Risten Birje Steinfjell, mielas lea somá go sámegielat bláđit ilbmet golmma sámegillii.

– Hui somá go bohtet eambbo sámegielat bláđit ja lea maid hui somá go leat golmma gillii. Mii dárbbahit sihke davvisámegielat bláđi ja dan lullisámegielat bláđi ruoktot.

Váhnemiidda buorre giellaveahkki

Steinfjell orru bearrašiin Romssas. Sin ruovttugiella lea davvisámegiella ja lullisámegiella, gávpogis gos dárogiella lea váldogiellan. Mánáide lea somá go besset iežaset gielaide lohkat dákkár bláđiid, dadjá eadneolmmoš.

– Hui somá go mii sáhttit mannat rámbuvrii oastit sámegielat bláđiid. Dat lea mielde loktemin dan árvvu daidda gielaide maid mii hupmat ruovttus, lohká son.

Mađi eambbo sámegiel girjjit ja almmuhusat ilbmet, dađi eambbo dat nanne sámi mánáid giela, lohká Steinfjell.

Su mielas leat dát almmuheamit ávkkálaččat maiddái váhnemiidda go dat dorjot giellaovdáneami. Dat doaibmá maiddái buorren giellaveahkkin váhnemiidda.

• Loga maiddái: Får endelig lese Donald Duck på morsmålet sitt

Dehálaš mánáide

Gielladutki mielas lea dehálaš ahte dákkár klassihkalaš buktagat almmuhuvvojit sámi mánáide ja nuoraide go dat buorida mánáid giellaovdáneami.

– Sii ožžot vejolašvuođa gullat ođđa sániid ja ođđa dadjanvugiid. Sii oidnet jietnademiid, ovdamearkka dihte “bang” ja “beašk” sániid, go daid ii oainne eará sajis, dadjá Berit Anne Bals Baal.

Bals Baal lea Giela, duoji, boazodoalu ja servodatdiehtagiid goađi dutki ja vuosttašlektor Sámi allaskuvllas.

Giellalávdi rievdagoahtán

Gielladutki muittuha ahte sámegielat leat áitojuvvon gielat ja oassin dasa lea go mii leat manahišgoahtán giellalávddiid gos giella lunddolaččat geavahuvvo.

– Ruoktu lea veahá manaheamen dan stáhtusa nanu giellalávdin dan geažil go mis leat nu olu šearpmat. Dat sisdoallu dávjá ii leat sámegillii, dadjá Bals Baal.

Sámegielat boddu ruovttus

Gielladutki rávve váhnemiid bidjat áiggi lohkat sámegiel girjjiid mánáide ja váldit ruovttoluotta ruovttu maid nanu giellaarenan.

– Lea dehálaš ahte sii maid besset lohkat sámegillii ja vásihit sámegiela čállingiellan ja dan bokte maiddái oahppat ođđa sániid ja dadjanvugiid, loahpaha Bals Baal.