Sávvet pokála fas loktet Verddečiekčamiin

– Vuoitin gal lea suohttaseamos, go beassat pokála loktet, dadjá Nils Johan Eira.

Spábbačiekči Eira gullá Fávrrosorda orohahkii ja lea Guovdageainnus eret. Dán vahkkoloahppa searvá 20. geardde Verddečiekčamiidda mat lágiduvvojit Buvrovuonas, Návuona suohkanis.

Son muitala ahte sii leat vuoitán čiekčamiid máŋgga geardde, ja sávvet fas vuoitit. Muhto ii gilvvohallan gal leat áidna mii geasuha.

– Eai olbmot soaitte nu dávjá šat mannat guossái ja oaidnalit. Dát leage hui buorre arena gos deaivvan veahá boares oahppásiin fas, muitala Eira.

Verddečiekčamiid ulbmil leage álggu rájes jo leamašan ásahit ovttasbargoarena ja ovdánahttit verddevuođa badjeolbmuid ja riddoássiid gaskka.

Buoridit verddevuođa

Anne Berit Bæhr lei mielde ásaheames čiekčamiid ja muitala ahte sii leat bures lihkostuvvan daiguin.

– Earenoamážit nuoraid gaskkas dovdo ahte dat leat hui olbmážagat, doppe eai leat makkárge riiddut nuoraid gaskkas, muitala Bæhr.

Dán jagi leat 30 joavkku dieđihuvvon Verddečiekčamiidda. Bæhr illuda go beroštupmi čiekčamiidda lassána.

– Čiekčamat orrot šaddan bivnnuheappo go ovdal. Dál leat 25 dievdojoavkku muhto eai leat go vihtta nissonjoavkku, muitala Bæhr.

Šaddá festiválan

Verddedoalut lea dán jagi viiddiduvvon ja dál lágiduvvo maid Verddefestivála.

– Dat lea hui buorre go viidána nie, de soaitá daidda olbmuide maid fálaldat geat eai čievčča spáppa, dadjá Bæhr.

Sámediggi juolludii gieskat 114 000 ruvnnu ovdánahttit Verddečiekčamiid vai lágideapmi stuorru. Dál šaddet doalut Verddefestiválan mat lágiduvvojit jahkásaččat.

– Mii leat ilus go háliidit viidáseappot ovddidit Verddečiekčamiid Návuonas. Verddečiekčamiin leat guhkes árbevierut ja mii jáhkkit ahte Verddefestivála ođđa konseapta sáhttá lihkostuvvat, dadjá sámediggepresideanta Silje Karine Muotka.