– Go moai bártniin fárrejeimma Oslos eret, de fertii son dieđusge heaitit Oslo sámemánáidgárddis. Muhto hállu lei mus ahte galggai beassat joatkit oahpahallat sámegiela.
– Nu fuobmáime musihkkárskihpáriin Nikolai Aurebekkain ahte hás ean geahččaladde gávcci oanehašfilmma ráhkadit mánáid várás – dakkár filmmat main sámegielsánit gullojit hui čielgasit oktan dievva ivnniiguin ja eará miellagovahallamiiguin.
Nie čilge filbmadahkki Ann Holmgren iežas ođđa gávccioasát filbmaráiddu.
– Lea hárve go sámi mánáide ráhkaduvvojit filmmat, muitala filbmadahkki Ávvirii.
Váillahit sámemánáid birrasa
Oslo sámemánáidgárdi Cizáš dat lei mii bovdii sihke mánáid ja ollesolbmuid boahtit geahččat filbmaráiddu vuosttaš filmmaža, mas namma lea «Ivnnit».
– Mii válljet Oslo sámemánáidgárddis čájehit filbmaráiddu vuosttaš filmmaža, go juo váillahit mánáidgárddi nu sákka, muitala Holmgren.
Filmmaš bistá badjel čieža minuhta, ja váldorollas lea neavttár ja dánsejeaddji Laara Stinnerbom. Anna Sunna lea ges filmma muitaleaddji.
– Ivnnit lea badjelaš čiežaminuhtasaš miellagovahallan oktan ivnniiguin, čuoččuha filbmadahkki ieš.
Hárjánan filbmaráhkadeaddji
Filbmadahkki Ann Holmgren lea earret eará leamaš mielde ráhkadeamen musihkkavideo ruoŧabeale artisttain David Åhlen.
Máŋggas muitet bures Holmgrena dokumentára iežas áhči birra, «Troens helter». Eará filmma maid lea ráhkadan lea «Edith ja Ajlosja» (olgguldas čujuhusat – teavsttat dárogillii).
«Ivnnit»-filmmas lei vuosttaščájáhus bearjadaga čakčamánu 23. beaivve Oslo sámemánáidgárddis.