Ailo ij la áhkoj jalik ádjáj bajássjaddam.
Bajássjattaj gis máttaráhkojnis Anna áhkkon.
Nieljejagágin de máttaráhkkos boarrásijsijddaj jådij.
Ja sujsta jámij gå Ailo lij dåssju lågenanguovte jagák.
Ailo ij val nav ålov máhtaráhkos mujte.
Bajássjattadijn de Ailo áhkos ja ádjás åhtsålij gæssta giehtojt gullat, ja gæssta rádijt oadtjot.
Valla dálla de la Ailo aktan NRK-barggoguojmij Naima Khan Nerdgårdajn (27) ja buvtadiddjijn Anne Kristine Rikardsenajn julevsáme guovlo birra mannamin vuorrasap ulmutjijt æjvvalittjat.
Ulmme l sijájt ságajda oadtjot gåktu lij åvddåla nuorran viessot, ja rádijt oadtjot nuoravuohtaj.
Li dal dan tjadá podkástav «Dálla ja dalloj» dahkam NRK:a åvdås, mij uddni almoduváj.
Dán podkásta tjadá vijmak Ailo dåbddå sujna l degu áhko ja ádjá iellemines, gå dal bæssá giehtojt gullat ja rádijt oadtjot dan tjadá.
- Munji ,guhti lav áhko ja ádjá dagi bajássjaddam, de dát ihkeva ålov merkaj.
Podkástan Naima káfastallá vuorrasij, ja guosse giehttu girjak subttsasijt viessomájgijstisá.
Ságájdahttem la sijá iednegiellaj julevsábmáj. Ij la guossak åvddåla julevsámegiellaj podkásta almoduvvam.
Naima la dákkir fálaldagáv nuorajda åhtsålam. Juska sån la dat gut ságav buktá, de ålov sunji merkaj oadtjot vájmogielav gullat.
– Sidáv julevsámegiella galggá sæmmi dábálasj álmmugij sjaddat dagu munji. Sidáv mijá histåvrå ja mijá álmmuga histåvrå galggi bessat sajev válldet ja ietjasa perspektijvaj birra subtsastit.
Giellarádevadde Árran julevsáme guovdátjin Jørn-Robert Knutsena mielas la podkástan geldulasj ja dárbulasj tiebmá, gånnå nuora bessi oassálasstet vuorrasij viessomis.
Duodden la suv mielas dárbulasj nuorajda gå sámegiella gullu. Sierraláhkáj gå bessi vuorrasap gielajda gulldalit.
– Giella má lassán, nuora oadtju vijdep fálaldagáv, javllá Knutsen podkásta birra.
Valla suv mielas la julevsámegielagijda hájn guhka gæjnno vádtset.
Binná mediefálaldagás la, ja sunji l gássjel dádjadit manen ij la åvdebut podkástajt dahkam julevsámegiellaj.
– Dát luluj má juo, lågev jage dás åvddåla juo, læhkám podkásta.
Knutsen jáhkká podkásta máhttá aktijvuodav nannit nuoraj buolvaj ja vuorrasij buolvaj gaskan.
– Soajttá måvtåstuhtti nuorajt ságastit ienebut sijáj ádjáj ja áhkoj ja vuorrasap ulmutjij.
Gulldala vuostasj oasev podkástas «Dálla ja dalloj» dánna:
