Vašši lei su dovdomearka – dál čájeha dovdduid

Guovdageaidnulaš Dan Aikio (18) fuomášii rapmusihka njeallje jagi áigi.

Su artistanamma lea Dan$ku, ja Dan$ku ii gal leat čohkkán lummasgieđaid dán jagi.

– Barggán musihkain juohke beaivvi gitta idjii, golmmaid rádjai, muitala son.

Dan$ku lea dán jagis almmuhan olles guokte álbuma ja guokte siŋgela.

Eanas musihkkáriin lea skearrofitnodat mainna ovttasbarget.

Nu ii leat Dan$kus.

– Olbmát ráhkadit munnje šuoŋaid, ieš bijan nuohta ja teavstta, muitala son.

Juste dál orru son Hársstáin, doppe vázzá musihkkasuorggi, álbmotallaskuvllas.

Ii heive mánáide

Vaikko su ođđaseamos álbumas, «Blokka», leat máŋga dovdduidečuohcci lávlaga, de leat vearjjut, áitagat ja politiijat dat mat dávjjimusat leat leamašan fáddán su lávlagiin.

– Manne nie garra teavsttat leat?

Dan$ku bohkosa.

– Mun dieđán dat eai heive mánáide. Mus leat diekkár ráppat danne go liikon diekkár musihkkii, vástida son.

Dan$ku lei guhká eahpesihkar galggai go almmuhit «Blokka» álbuma, danne go das ledje nu litna lávlagat.

Lihkká dagai dan.

- Lea áigi čájehit gii mun duođai lean, dadjá Dan$ku.

- Ja movt mu eallin lea, joatká son.

Tommy Tee rámida

NRK lea bivdán máŋggageardán Spellemann bálkkašupmevuoiti ja musihkkabuvttadeaddji, Tommy Tee, guldalit moadde lávlaga Dan$kus.

Son liiko dasa maid gullá.

– Dan$ku eahpitkeahttá máhttá ráppet!

– Gulan ahte sutnje lea álki ráppet. Ii son raža mange láhkai.

– Lea áibbas čielggas ahte Dan$ku lea jođus rievttes guvlui, dadjá Tommy Tee.

Vaikko Tommy Tee liiko vuohkái movt Dan$ku ráppe, de leat sus moadde rávvaga sutnje lihkká.

– Leat nu ollu ráppárat geat ráppejit politiijaid ja vearjjuid birra, muitala dovddus musihkabuvttadeaddji.

– Sávašin beassat oahpásnuvvat eanet Dan$kuin su musihka bokte, sávvá Tommy Tee.

– Veaháš eanet das ahte gii Dan$ku lea, gos son lea, ja gos lea leamašan, joatká Tommy Tee.

– Somá gullat!

Dan$ku illuda go gullá maid Tommy Tee lea dadjan su birra.

Váillaheapmi

Artisttanamma «Dan$ku» ii šaddan dáhpedorpmis.

Su eadnerohke lávii su Danskun gohčodit.

Čielga áigumuš

Dan$kus lea boahtteáiggeplána juo gárvvis.

– Áiggun geahččalit oláhit Amerihkái iežan musihkain, dadjá son.

Viđa jagi geahčen jáhkká son iežas juo almmuhan máŋga eaŋgalasgielat ráppa.

– Mun áiggun olahit iežan mihtu, eallit dušše musihkain, loahpaha Dan Aikio dahjege Dan$ku.

• GULDAL: Dáppe gávnnat Dan$ku musihka.
• GULDAL: NRK URBI - New Music Sápmi - playlist by NRK Sápmi | Spotify

Urbi

Nyheter og innhold om samisk musikk