NRK Meny
Normal

Stuoradiggi meannuda odne Deanusoahpamuša

Odne mearriduvvo Norgga Stuoradikkis mii dahkko Deanusoahpamušain.

Laksefiskere i Tanaelven
Foto: Eilif Aslaksen / NRK

Go Stuoradiggi bargagoahtá otná čoahkkinortnegiin, de lea deanusoahpamuš guđadin ja čihččedin listtus. Lea energiija- ja biraskomitea mii árvala Stuoradikki dohkkehit soahpamuša.

Nuppe dáfus evttohit stuoradiggeáirasat Kåre Simensen, Marit Arnstad, Kirsti Bergstø ja Torgeir Knag Fylkesnes ođđasit šiehtadallat dahje sihkastit bivdošiehtadusa Suomain.

Beaivvi mielde de čielgá mii dahkko soahpamušain.

Dáppe gávnnat njuolggosáddaga Stuoradikkis, mii álggii dii. 10.00.

Riikkaidgaskasaš soahpamuš

Norga ja Suopma leat 1873:a rájes reguleren guolásteami rádjejogas fárrolaga. Šiehtadusa eai leat ođasmahttán 1990:ii rájes. Danne leat Norgga ja Suoma ráđđehusat ođđa soahpamuša ráhkadan, mas lea ulbmilin unnidit guolásteami jogain.

Soahpamuša ferte sihke Norgga stuoradiggi ja Suoma riikabeaivvit dohkkehit. Mannán vahkkus dohkkehedje riikabeaivvit deanusoahpamuša 111 jienain, 53 jiena vuosttá.

Cuiggoduvvon soahpamuš

Soahpamuš lea ovdal garrasit cuiggoduvvon. Earret eará lea Deanučázádaga guolástanhálddahus moaitán ášši Stuoradikki dárkkistanlávdegoddái, go eai leat beassan oassálastit šiehtadallamiidda Suomain.