Beassášlávvardaga filbmiiga govvejeaddji Ken Are Bongo ja dokumentára ovddasvástideaddji Elisabeth Brun goasii juohke áidna lihkastaga maid nuorra mázelaš dagai Sámi Grand Prix loahppagilvvuid oktavuođas. SGP leage dehálaš oassi sihke dán muitalusas ja "SlinCraze" artistaeallimis.
SGP lei álgu
Nils Rune Utsi lei vuosttaš geardde lávddi alde SGP loahppagilvvuin jagis 2005. Dalle son guoimmuhii olbmuid Báktehárjis rap-lávlagiin "Givssideapmi". Lávlagis son rahpasit muitala man láhkái son givssiduvvui skuvllas ja dát lávlla leage su dahkan dovddusin.
- Dokumentáras muitalan iežan eallima birra ja mii fitnat maid daid sajiin gos feara mii lea dáhpáhuvvan, čilge Nils Rune Utsi.
Eanaš ráhkesvuođa birra
Nuorra ráppejeaddji dovdá iežas dál buorre muddui geargan vearrámus gillámušaidisguin. - Dál in rappe šat givssideami birra. Várra lean eambbo rávásmuvvan, bohkosa Nils Rune.
Miibat dál lea dáhpáhuvvan go du eanaš teavsttain lávllut ráhkesvuođa birra?
- In dieđe. Ráhkesvuohta. Dál orro leamen olbmuin eambbo ráhkesvuohta, čilge Nils Rune ja mojohallá.
Nubbin lávlongilvvuin
SGP`s Nils Rune oassálasttii lávlongilvvuide ovttas oappáinis Marit Susanne Utsiin lávlagiin osku. Dáinna soai bođiigage nubbin. Ola Stinnerbom gii ássá Göteborggas Ruotas vuittii lávlagiin "Snowflow". - Dát gal lei hirbmat suohtas, logai Nils Rune Utsi gilvvuid maŋŋá, iige orron gal áktánasat šlundon go ii vuoitán.
Dokumentára Nils Rune Utsi galggašii leat gárvvis čakčat dahje skábman dán jagi ja sáddejuvvot NRK Faktor-prográmmas. Seammá áigge galggašii maid SlinCraze vuosttaš CD-skearru almmustuvvot.