Skábmaviehkan geasuha ollu olgoriikkalaččaid

– Lea hui somá oaidnit ahte mii ná árrat juo leat nagodan čohkket ná ollu oasseváldit. Nu dadjá skábmaviehkamiid, Polar Night Half Marathon, jođiheaddji, Nils I. Hætta. Skábmaviehkangilvvut lágiduvvojit 2017 ođđajagimánu 7.beaivvi Romssas Norggabeale Sámis.

1800 dieđihuvvon viehkamiidda

Diibmá ledje 1430 viehkki dieđihuvvon. Badjel 500 dain ledje olgoriikkalaš viehkki. Dán jagi lea saddji 1700 viehkkái. Dábálaččat lea nu ahte leat viehkkit geat eai boađe viehkamiidda, vaikko leat dieđihan.

‒ Dat lea dagahan mii dán jagi leat dohkkehan 1.800 viehkki 66 riikkas, mii lea čuođi viehkki badjel bajimus meari maid sii ovdagihtii ledje dohkkehan viehkamiidda, muitala skábmaviehkangivlluid jođiheaddji, Nils I. Hætta.

• Gula Nils I. Hætta muitaleamen viehkamiid birra:

2004 rájes

Viehkangilvvut leat lágiduvvon jagi 2004 rájes, ja oasseváldiid lohkku lea jagis jahkái lassánan.

‒ Mii leat čađat bargan dan badjelii ahte oasseváldilohku galgá lassánit, ja mii leat maiddái ollu návccaid bidjan doaluid dovddusindahkamis olgoriikkas maiddái, dainna mii orrot bures lihkostuvvan, go dán jagi leat mielde oasseváldit 66 riikkas, dadjá Nils I. Hætta.

Earenoamáš vásáhus

‒ Olgoriikkalaččaide lea áibbas earenoamáš vásáhus boahtit Romsii ja Davvi-Norgi sevdnjes skábmaáiggis go vel beaivváš iige oidno, ja sáhttet vel vásihit guovssahasa. Dát dat maid geasuha olgoriikkalaččaid Davvi-Norgii ja Romsii, dadjá Hætta.

Liiko viehkat

Ellen-Marit Oskal lea okta dain gii leat searvamin viehkangilvvuide Romssas. Son lea golbmii searvan geasseviehkamiidda ja golbmii dálvegilvvuide.

Oskal lohka iežas lihkot viehkamis, muhto ii loga dan gal stuorimus ággan manin son searvá skábmaviehkamiidda Romssas.

• Guldal Ellen-Marit Oskal muitaleamen:

‒ Lea nu somá searvat gilvvuide go doppe leat mielde nu ollu olbmot, ja don dovddat iežat oassin stuorit olmmošjoavkkus. Nu dadjá Ellen-Marit Oskal, ja lohka vásihit mannulágan geasuheami ja sierralágan movtta searvat dákkár doaluide.