NRK Meny
Normal

Seksuálalasj råhtsatjibme l vuosádus- ja seminartiebmá

– Seksuálalasj råhtsatjibme l vilá mijáj gaskan, ja dat moaddásav guosská. Duodden li aj vájkkudusá stuoraga sijáj gaskan gudi lij dáv vásedam. Ja dat la aj dille sámij gaskan.

Julevsáme guovdásj Árran vuoset gåvåjt ja ásat seminárav seksualalasj råhtsatjime birra.

Julevsáme guovdásj Árran vuoset gåvåjt ja ásat seminárav seksualalasj råhtsatjime birra.

Foto: Sander Andersen / NRK

Dav javllá musea rádediddje Anne Kalstad Mikkelsen Árrana musean Divtasvuonan, ja gåhttju vuosádussaj ja seminarraj dán tiemá birra. Seminarra ásaduvvá dán máno 29. biejve, ja la tjuovvusin vuosádusás "Født til liv" Rita Anne Berntsenis mij vuoseduvvá Árranin tjuodtjelij mánnodagá rájes.

Unugis jienajt ierit válljip

Anne Kalstad Mikkelsen tjuottjot musea åvdåsvásstádus la aj dákkár ássjijt tjalmostit.

– Mij fámov háldadip, ja nav la vejulasj ierit válljit dav fámov juogu dal sebradahttet jali ålgodit. Ábajak lip mij, sáme sebrudagán aj, ierit válljim unugis jienajt. Mij lip tjalmostam dasi mij la tjábbe ja vuogas kultuvran. Dåjt ietjá ja unugis jienajt lip ierit válljim.

Anne Kalstad Mikkelsen

Anne Kalstad Mikkelsen.

Foto: Privat

Nav de soabmása vájvijt guoddi massta e åvvånis besa, ja man birra e duosta giehttot dajna gå sihti aktisasjvuohtaj ja sebrudahkaj gullut. Dát la tjuolmma sáme sebrudagán aj.

Árrana musea l oasse værmástagás mij barggá gássjelis ássjij ja ássjij mij rijdov båktå, ja nav la Árran jagij tjadá tjoavdek ja ájnas gatjálvisájt tjalmostam.

Diehttelis

Anne Kalstad Mikkelsenij la dal dát tiebmá diehttelis.

– Vuona kulturráde la mijáv válljim værmástahkaj museajs Vuonan ma de barggi dahkkár gássjelis ja rijddobåktelis ássjij. Ja dajna l de luondulasj dáhkkár ássjijda aj gæhttjat. Dajna de doajvov ålos oassálassti seminárraj majt lip gåhttjum "Sjávodisvuohta ij la agev buoremus".