Sámiráđi ovddeš presideanta njoammudii koronavirusa iežas eamidii ja bárdnái

– Dieđusge šállošan. Jus livččen diehtán dávda lea munnje njommon, de livččen vuolgán njuolgga buohccevissui, inge ruoktut. Muhto in diehtán ja dál mu bearrašis maid lea koronavirus.

Nu lohká Sámiráđi ovddeš presideanta, Aleksander Kobelev, NRK Sápmái. Beaivválaččat son bargá Lujávrri čearddalaš kulturguovddážis.

Kobelev biddjui gieskat buohccevissui go duođaštuvvui sus lea koronavirus.

Dál ii dovdda bákčasiid, muhto ferte olles mánu eallit sirremis ruovttus ja váldit dálkasiid. Eamit ja mánná leaba maid suinna erremis.

– Lihkkus dál eai leat rumašlaš bákčasat ja iige leat heaggavárra, giitala Kobelev.

• Loga maiddái: Lujávrri sápmelaččain suivadis giđđa vuordagis

Keskitalos dearvvuođat

Norgga sámediggepresideanta, Aili Keskitalo (NSR), lea moddii deaivvadan Aleksander Kobelevain.

Son lea ilus go Sámiráđi ovddeš presideanta lea beassan olggos buohcceviesus.

– Mun sávan son ja su bearaš fargga dearvvasmuvvet. Čájehuvvo ahte ollugat cevzet go koronavirus sidjiide njoammu, diehtá Keskitalo.

Aleksander eamidiinnis leaba buohccindieđihuvvon. 9 jahkásaš bárdni čuovvu gis skuvllas gáiddusoahpahusa.

Aleksandera bearrašis ii leat lohpi guođđit orrunsajiset. Visot dárbbášlaš gálvvuid nu mo borramušaid ja nu ain buktet fuolkkit.

Sii guđđet gálvvuid ásodaga uvssa ovdabeallái.

– Midjiide dat lea govttolaš čoavddus, dadjá Aleksander Kobelev.

• Loga maiddái: Yasmin Sofie (26) doarju gieldda čavga koronanjuolggadusaid

75 olbmui Lujávrris njommon

Lujávrri gielddas lea 75 olbmos duođaštuvvon koronavirus. Máŋgga lujávrilačča mielas dat lea balddihahtti, muhto ollugat eai beroš.

– Mun gal balan koronavirusis. Orru issoras erenoamážit go balan njoammudeames áhččán. Sus leat oainnat váttisvuođat geahppáiguin, čilge Karina Nizameeva.

Skuvla lea rabas beroškeahttá das, ahte ovtta oahppis lei duođaštuvvon koronavirus ja olles luohkká lei biddjon erremii.

Olles Murmánskka regiovnnas lea 15.885 olbmui njommon koronavirus.

Aleksander Julin (40) gal ii loga ballat virusis, iige doahttal eiseválddiid ávžžuhusa geavahit njálbmesuoji almmolaš báikkiin.

– Eanaš olbmot eai jáhke njálbmesuojis makkárge ávkki, čilge Julin.

Son diehtá maid, ahte eai leat áktánas ráŋggáštusat jus olbmot eai čuovo njuolggadusaid.

• Loga maiddái: Šohkas go korona bissehii heajaid