– Mun gal balan koronavirusis. Orru issoras erenoamážit go balan njoammudeames áhččán. Sus leat oainnat váttisvuođat geahppáiguin, čilge Karina Nizameeva.
Lujávrri skuvlaoahppi čuovvu dárkilit eiseválddiid eastadanrávvagiid.
– Basan gieđaid ja geavahan njálbmesuoji almmolaš sajiin.
Muđui geahččala Karina eallit nu dábálaččat go vejolaš. Son vázzá skuvlla ja lea mielde dánsunjoavkkus kulturviesus.
- Loga maiddái:
– Njálbmesuojis ii leat ávki
Ollugat Lujávrris orrot eallimin nu mo dábálaččat virusáitagis beroškeahttá.
Máŋggas eai váldde dili duođas.
Ruošša nationála iskkadeapmi čájeha, ahte almmolaš báikkiin nugo buvddain dušše juohke goalmmát olmmoš geavaha njálbmesuoji.
– Eanaš olbmot eai jáhke njálbmesuojis makkárge ávkki, čilge Aleksander Julin (40).
Son diehtá maid, ahte eai leat áktánas ráŋggáštusat jus olbmot eai čuovo njuolggadusaid.
- Loga maiddái:
Birastahttá Lujávrri
Murmánskka guovllueiseválddiid almmolaš logut čájehit, ahte koronavirus ain leavvá regiovnnas.
Olles Murmánskka regiovnnas lea 15.885 olbmui njommon koronavirus. Eanemusat leat Murmánskka gávpogis, gos 9.041 olbmui lea njommon.
Militeara báikkiin lea maid koronavirus ollugiidda njommon; Belokamenka 2.333, Severomorsk 1.446 ja Beahcáma gielda 621.
Lujávrri gieldda lagaš gielddain lea maid ollugiin virus; Mončegorsk 592. Apatiti 336, Boazovárri (Olenegorsk) 240, Gáddeluokta 226 ja Kirovsk 187.
- Loga maiddái:
Servodaga ásahusat rahpasat
Vaikko koronavirusdilli vearrána, de eiseválddit eai hohpohala vuos bissehit ásahusaid doaimmaid.
Mánát vázzet sihke mánáidgárddiid ja skuvlla. Eará astoáigedoaimmat leat maid rahpasat almmá duođalaš ráddjemiid haga.
Skuvla lea rabas beroškeahttá das, ahte ovtta oahppis lei duođaštuvvon koronavirus ja olles luohkká lei biddjon erremii.
Lujávrri báikkálaš eiseválddit eai leat ásahan sierra njuolggadusaid virusa eastadeami várás.
Sii dušše čuvvot rávvagiid ja gáibádusaid, mat bohtet bajábealde – Murmánskka fylkka ráđđehusas.
Otná beaivái lea dušše gáibádussan geavahit njálbmesujiid almmolaš báikkiin ja ásahusain.
- Loga maiddái: