Sámiráđi ovddeš presideanttas, Aleksander Kobelevas, lea duođaštuvvon koronavirus ja lea dolvojuvvon buohccevissui. Dát dáhpáhuvai maŋŋá go gieskat bođii riemuin Moskvas. Su bargoustibat Lujávrri čearddalaš kulturguovddážis leat guovtti vahku erremis.
Alimusriekti ii vel leat cealkán duomu Kárášjoga-áššis. Nu lea ge ain eahpečielggas galgá go dušše Finnmárkkuopmodat (FeFo) hálddašit ealgabivddu Finnmárkkus, vai gártá go juogadit dán barggu Kárášjoga gieldda ássiin.
FeFo lea otne almmuhan ahte sii dat goit ráhkkanit ealgabivdoválaid juohkimii, go dál lea juo miessemánnu.
– Dán jagáš ealgabivddu almmuheapmi lea maŋiduvvon vuorddedettiin duomu Kárášjoga áššis, muhto mii leat gergosat almmuhit bivddu nu jođánit go duopmu lea celkon, čállá FeFo.