Yasmin Sofie (26) doarju gieldda čavga koronanjuolggadusaid

– Mu mielas lea buorre go váruhit, ahte eat váldde mielde koronadávdda go boahtit máddin. Dán áigge lea bággu leat várrugas, dadjá Yasmin Sofie Holmestrand NRK Sápmái.

Su ruoktogielda Kárášjohka lea okta gielddain davvin gos leat mearridan, ahte buohkat geat bohtet olgoriikkain dahje Mátta-Norggas galget guovtti vahku errenáigái ovdalgo sáhttet leat olbmuid siste.

Gielda doalaha dáid sierranjuolggadusaid vaikko dearvvasvuođaministtar Bent Høie ikte čielgasit celkkii, ahte dán eai berre dahkat.

– Mii eat rávve gielddaid ásahit sierra errennjuolggadusaid, dajai Høie go ráđđehus ikte almmuhii ođđa nationála bagadusa makkár errennjuolggadusat gielddain berrešedje leat.

• Loga: Lujávrri sápmelaččain suivadis giđđa vuordagis
• Loga: Šohkas go korona bissehii heajaid

Čujuhit láhkii

Yasmin Sofie Holmestrand orru Oslos gos son studere psykologiija. Fargga guovtti vahku dassái son bođii Kárášjohkii, gos son dakkaviđe biddjui errendillái.

Kárášjoga gielddas oaivvildit sis ii leat dušše vuoigatvuohta mearridit čavga errennjuolggadusaid, muhto maiddái geatnegasvuohta.

Sii čujuhit njoammugáhttenláhkii.

– Mii gal áigut doalahit dáid errennjuolggadusaid mat mis leat. Mis oainnat lea bággu gáhttet iežamet, go koronadávda ii leat vel leavvan deikke nu mo muhtin sajiin máddin, čilge Kárášjoga sátnejođiheaddji Svein Atle Somby.

Kárášjogas lea dássái dušše ovtta olbmos duođaštuvvon koronavirus. Somby sávvá, ahte eai nu galle eambbo olbmo galggašedje dárbbašit vásihit dán.

– Garra errennjuolggadusaiguin mii sávvamis hehttet olbmuid buktimis dávdda dakkár guovlluin gos dát dál lea, deattuha Somby.

Garraseamos njuolggadusat leat Várggáid gielddas gos leat mearridan, ahte buohkat geat dohko bohtet eará gielddas galget guovtti vahkkosaš erremii.

• Loga: Studeanttat sáddejit reivviid ja dollet cyberfeasttaid

– Dál han lea heahtedilli

Tor Gunnar Nystad (53) lea bajásšaddan Kárášjogas, muhto lea moanaid jagiid ássan Oslos.

Son doarju buot gielddaid davvin main lea «søringkarantene», nu mo dát gohčoduvvo dárogillii. Danne son lea mearridan ahte dán jagi ii vuolgge beassášlupmui davás.

– Ádden hirbmat bures go gielddat davvin dál leat várrugasat. Dál han lea heahtedilli ja dát njuolggadusat eai leat mearriduvvon duššiid dihtii, dadjá Nystad.

Son diehtá gielddat leat vuđolaččat ja fágalaččat árvvoštallan dáid áššiid ovdalgo mearridedje sierra errennjuolggadusaid.

– Davvin lea máŋgga sajis guhkki lagamuš buohccevissui ja doppe ii leat seammá álki go máddin oažžut veahki. Danne fertejit gáhttet iežaset nu bures go vejolaš, oaivvilda Nystad.

Yasmin Sofie Holmestrand beassá gaskavahku eret errendilis, ja son diehtá mii lea vuosttaš maid áigu dahkat go fas beassá «luovus».

– Dalle áiggun mannat buorrestit eatni ja áhku, jus dan sáhttá dieđusge, dadjá Yasmin Sofie ja mojohallá.