2016:s almmuhedje golmmalogi-moadde sámi artistta musihka. Dáin artisttain lea NRK Sápmi válljen 18 evttohasa "Sámi rádiohitta 2016" -gilvui.
Diibmá vuittii Felgen Orkestera lávlla Buolli Dolla dán gilvvu. Vuoitu dalle lei «Sami Music Awards» luhkka ja studioáigi.
Gii dán jagi vuoitá, mearridat don.
– Mun in nagot válljet dušše ovtta šuoŋa, dadjá Tanja Linnea Eriksen Norbye, guhte lea okta dain gii leamaš mielde mearrideamen makkár lávlagat leat mielde jienasteamis.
Guldal rádios
Golbma maŋŋálas vuossárgga gulat dáid šuoŋaid oktan kommentáraiguin NRK Sámi beaivesáddagis. Vuoiti almmuhuvvo Sami Music Awards doaluin álggogeahčen guovvamánu.
Gáibádusat
Njealjis leamaš mielde mearrideamen evttohasaid: Kolbjørn Norvang, Elle Gaup, Tore Skoglund ja Tanja Eriksen Norbye.
Joavkkus ledje dát gáibádusat evttohasaide: Šuoŋat fertejit leat almmuhuvvon, ja čuojahuvvon gaskal skábmamánu 1. beaivve 2015 ja skábmamánu 1. beaivve 2016. Joavku lea maid árvvoštallan gallii lea čuojahuvvon rádios, lea go buorre buvttadeapmi, ja dieđusge subjektiivvalaš oainnu mielde.