Sámi giellahálddašanguovllu gielddaid organisašuvnnat, fitnodagat ja servvit sáhttet dál loktet bargiid ja lahttuid gelbbolašvuođa jos váldet oktavuođa Tromssa Folkeuniversitehttain.
Doppe lea ruhta iešguđetge laganaš kurssaide.
«Vox» mii lea nášunála gelbbolašvuođapoletihka fágaorgána, fállá dál gealboloktenkurssaid eaktodáhtolaš organisašuvnnaide, servviide ja fitnodagaide. Danne ohcá Folkeuniversitet Tromssas oktavuođaid sámi giellahálddašanguovllu gielddaiguin, ja ásahusa ossodatjođiheaddji Hilde Widding ávžžuha servviid ja organisašuvnnaid sámi giellahálddašan gielddain ohcat ruhtadoarjagiid lágidit kurssaid main loktešedje gelbbolašvuođa iežaset miellahttuin ja bargiin.
Folkeuniveritehtta Tromssas ohcá oktavuođaid
Kárášjogas, Guovdageainnus, Porsáŋggus, Deanus, Unjárggas, Gáivuonas, Loabain ja maiddái Divttasvuonas, Raarviihkes ja Snoasás lea dál vejolaš oažžut gealbolokten kurssaide ruhtadoarjaga.
Ruhtadoarjaga sáhttet searvvit ja organisašuvnnat ohcat kurssaide gos olbmot oahpašedje buorebut lohkat ja čállit.
Maiddái rehkenasttin kurssaide sáhttá ohcat ruhtadoarjaga, ja digitala nugo interneahta geavahan ohppui vai boarrasat olbmotge oahpašedje geavahit dihtoriid. Sámegieldkurssaide ožžot álkidit doarjaga.
Fitnodagaide fállet maid veahkki
Fitnodaigain lea maid vejolaš ohcat ruhtadoarjaga vai bargiid gelbbolašvuođa sáhtašedje buoridit.
Danne sáhttet maid fitnodagat ohcat Folkeuniversitehtas ruhtaveahkki lágidit kurssaid.
Stáhta bidjan ruđa sámi giellahálddašan guovlluide gealboloktemii
Lea nu ahte dušše sámi giellahálddašangielddain sáhttet ohcat ruhtadoarjaga kurssaide. Stáhta lea juolludan vihta miljon ruvnnu Tromssa Folkeuniversitehttii vai sáhttet veahkehit servviid, organisašuvnnaid ja fitnodagaid sámi giellahálddašanguovlluin lágidit gelbbolašvuođa loktema iežaset miellahttuide ja bargiide.
Sámegielkurssaide lea erenoamaš álki oažžut ruhtaveahkki Folkeuniversitetet bokte, ja dasalassin lea eaktodáhtolaš servviin vejolaš ohcat ruhtaveahkki lágidit kurssa vuorrasat olbmuide vai oahpašedje geavahit interneahte, go dán áigge illá birge dán oahppu haga.