Ávvumállásat sámi álbmotbeaivái

Loga dárogillii.

Elle Sáve liiko málestit, ja erenomážit sámi borramuša.

Dál lea son ráhkadan sámi ávvumállása, maid háliida juogadit. Siskkit čoarbbealdeahkki bassojuvvon biehčamiin.

Mii leat su váhnemiid gievkkanis Mázes, Guovdageainnu suohkanis.

Málesteapmi sáhttá álgit, ja buđehat galget šaddat buđetmeastun. Son dohppe doddjon buđetmeasto-reaiddu ja bohkosa.

– In geavat nu váttes reaidduid ruovttus, geavahan daid maid earátge geavahit, dadjá Elle Sáve.

Sus lea goahkkaoahppu ja máŋgga jagi bargohárjáneapmi restauránttain ja offshore-bargguin.

Eatnašat dáidet jurddašit ahte biehčamat eai gula málestallerkii. Muhto olu sápmelaččat borret ain biehčama, justa nu go sin máttut dahke.

– Midjiide lea dábálaš borrat biehčama. Muhto lea dábáleamos ahte vuoššat dan čielgemállásis, čilge Elle Sáve.

Dál eai galgga biehčamat vuššojuvvot, muhto ommanis bassojuvvot.

Elle Sáve bidjá daid ommanlihttái ja bidjá dan ommanii.

Loga eanet sámi sisdoalu dáppe.

Gos fidnet biehčamiid?

Dákkár mállásii ferte bures ráhkkanit, go sáhttá leat váttis fidnet málesráđiid.

Siskkit čoarbbealdeahki ja ađđamiid gávnnat muhtin borramušgávppiin, muhto biehčamiid it gávnna dábálaš gávppiin.

Lihkus leat dasa eará čovdosat.

– Gávdnojit máŋga smávva fitnodaga, mat vuvdet buot osiid bohccos. Daid gávnnat buot báikkiin gos lea boazodoallu, dadjá Elle Sáve.

Muhtin fitnodagain lea sierra gávpi omd. Oslos. Ja eará fitnodagat gis sáhttet sáddet bierggu dutnje.

Jus dattetge it fidne buot ávdnasiid, de gávdnojit maid eará čovdosat.

Sáhtát lonuhit siskkit čoarbbealdeahki čielgge- dahje savodehkiin. Bohccoađđama sáhtát lonuhit vuoksáađđamiin. Jus it gávnna ađđama obanassiige, de sáhtát baicca geavahit vuoja.

Oaččut maid ollislaš mállása biehčamiid haga, jus daid it fidne.

Ađasevsa

Ruksesviidnasevsa lea dál masá gárvvis, muhto das váilo okta dehálaš oassi.

Elle Sáve luvve ađđama unna basttežiin.

– Lean viežžan inspirašuvnna fránska ruksesviidnasevssas «bordelaise» masa biddjo vuoksaađa.

Ađa cáhppo smávva bihtážiidda ja biddjo ruksesviidnasevsii. Dál ii leat go duldehit sevssa ovdalgo lea gárvvis.

– Mu mielas lea somá čájehit biepmu maid ráhkadan, ja sávan ahte olbmot ožžot inspirašuvnna das.

Čájáhaddat biepmu maid ráhkada, ja seammás inspireret earáid ii leat mihkke ođđasiid Elle Sávii. Álggogeahčen 2022 ráhkadii son Instagram-konto «Njálggat».

– Mu háliidivččen sierra TV-prográmma mas ráhkadan biepmu, dadjá son.

Ahte Elle Sáve berošta eambbo go gaskamearálaččat biepmuin ja nanaguoddevašvuođas boahtá čielgasit ovdan.

Dál lea son aitto guossohan ávvumállásiid muhtin máilmmi čeahpimus koahkaide riikkaidgaskasaš kohkkengilvvus Bocuse d'Or, mii lágiduvvui Lyonis Frankriikkas.

– Lean nu rámis dainna borramušain maid guossoheimmet. Árbevirolaš sámi bohccobiergomális, čállá Elle Sáve iežas Instagram-kontos.

Rihčasmáhka birgui

Hárjánan lihkastagaiguin gárvánišgoahtá ávvumális.

Buđetmeastu lea mollejuvvon ja ruksesviidnasevsa lea gárvvis. Ruotnasat ja guobbarat leat giksan. Čoarbbealdeahkki lea báistojuvvon bánnos ja liggejuvvon rievttes temperatuvrii ommanis oktan biehčamiiguin.

Juoga vižžojuvvo galmmihanskábes. Unna lihtážis oránša bihtát.

– Dá lea luomedildi. Mun liikon bidjat biergomállásii juoga mas lea rihčasmáhkka.

– Jokŋameastu sáhttá maid geavahuvvot jus dasa liiko buorebut, dadjá Elle Sáve.

Leat ollen málesteami maŋemuš oassái. Koahkkan ja biebmo-váikkuheaddjin lea Elle Sáve hárjánan bardit biepmu čábbát tallerkii.

Luomedildobihtát heivehuvvojit biepmu birra. Loahpas čiŋahuvvo maid ruotnasiiguin, ja govvideapmi sáhttá álgit.

Loga olles ráhkadanneavvaga vuolimusas artihkkalis.

– Biebmu lea eambbo go dušše birgen

Elle Sáve háliida movttiidahttit olbmuid borrat eambbo ruovttudahkan borramuša. Muhto manin lea dát nu dehálaš sutnje?

– Dutkan čájeha ahte ii leat dearvvašlaš borrat ultraprosesserejuvvon biepmu. Dasa lassin lea sihke nanaguoddevaš ja birasseasti borrat biepmu maid ieš ráhkada, dadjá son.

Elle Sáve sávvá ahte olbmot leat dihtomielalaččat das maid ostet ja borret.

– Sáhtát oažžut olu biebmoávdnasiid nuvttá jus ieš daid hágat meahcis. Lea maid buorre doarjut báikkálaš fitnodagaid.

Dál ii leat go borrat mállásiid, ja dan ilu beassá Elle Sáve bearaš návddašit.