Piera Eira (29) juoiggastii Issát Máhte Triumfa rahpandilálašvuođain Berliinnas. Eatnašat dovdet dán luođi «Sámi Eatnan»-luohtin.
Biđus
Biebmu
Buoremus
Boazu
Birget
Boahtteáigi
Olgoriikkas erenoamáš? Sisriikkas gis eiseválddiid ovddas?
Mo Sápmi vuovdaluvvo.
Norgga eanandoallo- ja biebmoministtar Geir Pollestad lei rámis.
Son čevllohalai go hálai boazodoalu ja bohccobierggu birra.
Dán jagi biebmo- ja mátkeealáhusmeassuin duiskka oaivegávpogis Berliinnas - Grüne Woches - lei sámi kultuvra ja bohccobiergu guovddážis.
Norga geavahii 11,5 miljovnna kruvnna dán jagi doaluide.
Kautokeino Rein ovddasteaddji Per Ivan Bongo guossohii iešguđetlágan biebmuid olbmuide.
Oktiibuot ledje 65 Davvi-Norgga ja Trøndelaga fitnodaga gávpemárkaniin.
Ellinor Guttorm Utsi lei Norgga sáttagotti mielde.
– Lean hui čeavlái go lean Norgga goavddi vuolde, ja seammás lean dáppe muitaleamen sámi kultuvrra birra.
Muhto seammás go guldalii ministara, jorragohte maid eará jurdagat.
Miehtá Sámi háliidivčče ceaggut bieggaturbiinnaid. Dasa lassin dárbbašuvvojit ođđa el-fápmolinjját ja geainnut.
Ministarat, geat dáhtošedje dán lágan ovdáneami, čujuhit dasa ahte Norga dárbbaša eanet el-rávnnji.
Miehtá Sámi leat eanariggodagat, maid ruvkefitnodagat oččodit.
Eurohpa dárbbaša viehka olu veaikki ja eará metállaid ruoná molsašupmái.
Dákkár doaimmaide leat maiddái riikkapolitihkkárat ja ministarat mielas.
– Mii eat sáhte eallit duppal gulahallamiin ráđđehusain. Okta ministtar hállá daid erenoamáš geasuheaddji bohccobiergobuktagiid birra, ja eará ministarat háliidit váldit stuorra areálaid bohccuin, cealká Ellinor Guttorm Utsi.
Ellinor dieđihii ahte jus sii boahtteáiggis galget beassat fállat bohccobierggu, de eai sáhte eará industrijat sin duvdit eret.
– Boazu dárbbaša luonddu addit dakkár lunddolaš, fiinna buktagiid maiguin mii leat nu čeavlát dáppe odne.
Eanandoalloministtar Geir Pollestad lohká iežas áddet boazodoalu dárbbuid ja beroštumiid.
– Mu bargu boazodoalloministtarin han lea doaibmat dakkár jietnan ráđđehusas mii ovddida dáid áššiid, dadjá son.
Son jáhkká seammás ahte šaddá areálaid alde gilvu.
Pollestad lohká iežas vásihit ahte ráđđehusas leat buorebut áddegoahtán ahte lea dehálaš vuhtiiváldit sámi beroštumiid.
– Mii fertet oahppat das mii lea leamaš, dadjá ja čujuha Fovse-áššái.
Biđus. Biebmu. Buoremus. Boazu. Birget. Boahtteáigi.
Dan birra dat maid šattai sáhka go Innovasjon Norge ja Eanandoallodepartemeanta lei bovden sápmelaččaid olgoriikii.
Finnmark Rein AS ovddas guossohii Inga Smuk biđđosa duiskalaččaide.
Ja boahtte jagi lea fas Sápmi Berliinnas.
Ansvarlig redaktør: Vibeke Fürst Haugen
Nettsjef: Hildegunn Soldal