Guovttis leaba su unohis vuogi mielde čuvodan dahje oavnnjildan guhkit áigge.
Dan birra muitalii Sandra Andersen Eira vuosttaš geardde almmolaččat «Studio Sápmi» TV-prográmmas gieskat. Oavnnildeaddji gohčoduvvo eaŋgalasgillii «stalker».
Nubbi lea nuorra almmáiolmmoš, gii ovtta áigge ásai tealttas su ruovttu olggobealde. Son earret eará sáddii earáide govaid su viesus. Nubbi gis lea eallilan nissonolmmos.
Šattai riikkabeakkálmassan
Guktot iđisteaigga su eallimii go son šattai riikkabeakkálmassan maŋŋelgo lei oidnon Dagsrevyenis.
– Nubbi oavnnjildeaddji lei eambbogo giksin, čilge Andersen Eira iFinnmark neahttaáviisii (máksu gáibiduvvo). Son muitala áviisii, ahte fertii mannat politiijáid lusa go dát olmmoš su lei vuorjan máŋga jagi.
– Mu dorvvolašvuohta áitojuvvui. Mu bearaš maid ballagođii.
Studio Sápmi TV-prográmmas son muitalii, ahte oktii son fertii eváhkoerejuvvot álbmotčoahkkimis eallilan nissonolbmo geažil. Eará háve dát nissonolmmoš bođii biillain, rullii biilaglása vulos ja čearggui fasttes áššiid.
Ii vuollán heaitit
Vaikko ášši dál lea politiijaášši, de nissonolmmoš ii vel vuollán. Son joatká áitimis Eira Facebook bokte.
– Son ii áiggo makkárge buriid munnje, go son bidjá earret eará videoid mat čájehit niibbástallama. Dát nisu lea maid čállán reivviid eará sámediggeáirasiidda mas mu vuostá leat feara makkár sivahallamat, čilge son.
Láhka roavva oavnnjildeamis čavgejuvvui jagis 2016. Ráŋggáštusrámma lea gitta njeallje jagi giddagasas.
