Reagere ruvkefitnodaga gávdnosii
Ruoŧa ruvkefitnodat LKAB almmuhii gieskat ahte sii leat gávdnan Eurohpa stuorámus hárvves eananmetálla gávdnosa.
Sii oaivvildit gávdnosa dehálažžan ruoná nuppástuhttimii. Dasa reagere Ruoŧa Sámedikki Sámiid Riikkabellodaga politihkkár, Káren-Ann Hurri. Son dadjá ahte sámiin lea áibbas eará oaidnu ruoná nuppástuhttimii ja oaivvilda industriija ja politihkkáriid oamastan doahpaga ja dagahan dan márkanfievrridanvuohkin.
-Sii eai leat dáid metállaid ohcan buoridit planehta, dadjá Hurri.
LKAB ges dadjá ahte sin bargu lea unnidit fossiillanuoskkideami, iige leat sin duohken mearridit mii ruoná nuppástuhttin lea, sii gullet dušše maid politihkkárat ja birasdutkit dadjet.
– Jus háliida ođđaáigásaš ja buorre eallima mas čálgu lea guovddážis, de das leat váikkuhusat. Dalle mii fertet ohcat metállaid, dadjá LKAB mediahoavda Anders Lindberg.
Loga olles ášši dás.