– Otná muitoboddu galgá čalmmustahttit ahte buot min nuorat bohte dearvan ruoktut, terrorfalleheamis. Dán leat mii plánen fárrolagaid nuoraiguin. Sii leat ieža, oktan váhnemiiguin, sávvan dán.
Kárášjoga ráđđealmmái, Elfrid Boine, lea okta gieldda ovddasteddjiin, geat odne sávvet bures boahtima otná suoidnemánu 22. beaivve muitoboddui.
12 Kárášjoga nuora ledje Utøya-nammasaš sullos, Tyrifjordenis, Mátta-Norggas, justa njeallje jagi áige.
Sii oasálastte Bargiidbellodaga jahkásaš nuoraiddeaivvadeamis, go terrorista fallehii nuoraid ja olbmuid geat ledje sullos.
Ii lágideapmi leamaš golmma jahkái
– Mu mielas lea buorre ahte sáhttit dán láhkai muittášit. Dát lea gal sevdnjes beaivi máŋgasiidda. Stuorámus háliidus dás lea varra dušše beassat servvoštallat moadde tiimmu odne, muitala ráđđealmmái.
Kárášjogas ii leat golmma jahkái leamaš 22.7-muitolágideapmi. Maŋimuš geardde lei eará sániiguin geassit 2012. Danin leat nuorat dán jagi háliidan fas dakkár lágideami.
– Odne besset nuorat ieža, ja váhnemat, dadjat moadde sáni – mo dilli leamaš maŋimuš njeallje jagi, ja mo oidnet boahtteáiggi. Muhto lea gal ainge dat sosiála bealli dás mii šaddá deháleamos, muitala Boine.
- ČOAHKKESIIDU: Loga eanet 22.7-áššiid sámegillii dás
– Mis lei lihkku
– Vaikko surgadis ja váivves dáhpáhusat – sáhttágo dadjat Kárášjogas lei ovtta láhkai lihkku?
– Go jurddaša ahte mis ledje 12 nuora geat vásihedje Utøya-dáhpáhusa, ja buohkat bohte fas ruoktut, de gal sáhttá dan dadjat.
– Ja earret eará dan šaddatge odne ságastallat, fástida ráđđealmmái Boine.
Muitoboddu buohkaide
– Otná lágideapmi lea viehka dehálaš. Ja dat han leage buohkaide vejolašvuohta boahtit doarjut ja oktavuođadovddu čájehit, lasiha son.
Kárášjoga gielddas áigot maŋŋá otná lágideami, geahčastit vejolašvuođa jahkásaččat lágidit suoidnemánu 22. beaivve muitobottu.
– Lunddolaš dás lea čoahkkinastit nuoraiguin ja váhnemiiguin. Dás leat earret eará sáhka plánemis ja ruhtadeamis, loahpaha Kárášjoga ráđđealmmái.
Otná lágideapmi álgá tiibmu 18:00, Sámi dáiddaguovddážis. Olles prográmma lea almmuhuvvon Kárášjoga gieldda neahttasiiddu bokte (olgguldas čujuhus).
