Čoahkkanit fas Utøyai boahtte vahkkus

Nuorat čoahkkanit fas Utøyai borgemánu 4.beaivvis gitta 7.beaivvi rádjai. AUF áigumuš lea ahte nuorat ieža galget oahppat jurddašit mii demokratiija lea, ja movt dan galggaše suddjet. AUF bealis lea áigumuš ahte nuorat maiddái galget oahppat maid sátnefriddjavuohta, gierdavašvuohta ja máŋggabealatvuohta mearkkaša.

Máhcahan fas sullo nuoraid háldui

AUF jođiheaddji, Mani Hussaini, lohka dehálažžan ahte nuorat besset čoahkkanit sullui, ja ovttas moraštit ja muittašit daid nuoraid geaid terrorista bážii ja gottii sullos jagi 2011 suoidnemánu 22.beaivvi.

–Lea dehálaš čoahkkanit ja ovttas eará nuoraiguin muittašit ja moraštit, dadjá Mani Hussaini.

• Guldal Mani Hussaini vástádusa dárogillii:

Diibmá lei vuosttaš geardde go fas lágiduvvui geasseleaira Utøyas, ja Hussaini muitala ahte váhnemat ledje hui duhtavačča go sii besse oaidnit ja vásihit dan báikki mii sin nuoraide lei ja lea nu dehálaš, gos nuorat besse suohtastallat, falástallat, digaštallat politihka jna.

Ii mihkkege leat nu diehttelas

AUF jođiheaddji, Mani Hussaini muitala ahte Utøya dál ovddasta eanet go maid dagai ovdal terrorfalleheami.

–Dál go terrorfalleheamit deaividit ain duollet dalle iešguđetge guovlluin máilmmis, de lea Utøya čielga muittuhussan midjiide buohkaide ahte demokratiija ja gierdevašvuohta dattetge ii leat nu diehttelas. Dan dadjá Hussaini, ja lasiha ahte AUF árvvut hástaluvvojit beaivválaččat, ja ahte sii čađat fertejit dáistalit daid ovddas.

• Loga NRK Sámi ođđasiid neahtas

Oahppoguovddáš

Maŋŋil terrorfalleheami Utøyas vásihii AUF stuorra miellahttolassáneami. Dan muitala AUF váldočálli, Ragnhild Helene Kaski, ja lohka vel dál nai miellahttologu lassánit. AUF lea Norgga stuorimus mánáid- ja nuoraidorganisašuvdna, ja organisašuvnnas lea dál 14 000 miellahtu, muitala Ragnhild Kaski. Son lohka ollu nuoraid dál fitnamin vuosttaš geardde Utøyas.

-Midjiide lea dehálaš ahte Utøya fas váldo adnui vai sii sáhttet čađahit daid doaimmaid sullos maid sii čađat lea doaimmahan.

• Guldal jearahallama ragnhild Helene Kaskin dárogillii dás:

Dál go dohko lea huksejuvvon sierra oahppoguovddáš, de galggaše ollu eanet olbmot fitnat doppe ja ieš vásihit sullu ja guovllu loahpaha AUF váldočálli Ragnhild Helene Kaski.