Sámegielda sáhttá fas massit bargosajiid

Ráđđehus gáibida seastima Stáhta geaidnodoaimmahagas ja nuppástumiid. Dás leat stuorra váikkuhusat sámi gildii.

Aina Borch

Porsáŋggu sátnejođiheaddji Aina Borch lea iskagoahtán makkár váikkuhusat leat das go Leavnnja geaidnostašuvdna árvaluvvo heaittihuvvot dálá hámis. 

Foto: Dan Robert Larsen / NRK

Porsáŋggu gielda bivdá dál čoahkkima johtalusministariin go ballet olu bargosajiid jávkat Stáhta geaidnodoaimmahaga stašuvnnas gielddas.

Manne gielddas lea dát ballu lea diehtu mii johtalusdepartemeanttas lea mannan go leat bivdán Geaidnodirektevrra heaittihit 22 dálá 74 johtolatstašuvnnas, ja nu heaittihuvvo Leavnnja johtolatstašuvdna, mii lea Porsáŋggu gielddas.

– Dál bivdit ge čoahkkima Johtalusministariin, vai čielggaduvvo makkár váikkuhusat dás duođai gártet jos mii massit dán stašuvnna Leavnnjas, čilge sátnejođiheaddji Aina Borch.

Vuodjinkoarttat

Dál massá Leavnnja johtolatstašuvdna vejolašvuođa fállat mohtorsihkkel, skohter, tráktor ja losit vuojániid vuodjinkoarttaid váldit, seammás go biilavuodjinkoartta bálvalusa geahččalit ain muhtin láhkái fállat, go eará báikkiin bohtet olbmot geat dan fálaldaga čađahit duollet dálle.

Geaidnodirektoráhta árvvoštallamis eai oainne dán stašuvnna beare olu geavahuvvot dát bálvalusat, nu galgá ge heaittihuvvot.

Justa dat seammá lea stašuvnna hárrái Ráissas, Tromssa fylkkas, go dan heaittihit.

Iskkagoahtán váikkuhusaid

– Mii leat mánu áigge ožžon dieđu johtalusdepartemeanttas dáid doaimmaid hárrái, mas bivdet iskat ja fuomášuhttit makkár váikkuhusat leat dáid árvaluvvon rievdadusain, ja barggut leat álggahuvvon. Danne eat hálit dál vuos lohkat nu olu mo dát čuohcá dáid namuhuvvon johtolatstašuvnnaide. Dán čállá Stáhta geaidnodoaimmahaga Davvi regiovnna johtolat ja vuojániid ossodathoavda Jørn Simonsen sms bokte.

Jørn Simonsen

Stáhta geaidnodoaimmahaga Davvi regiovnna johtolat ja vuojániid ossodathoavda Jørn Simonsen lohká bargagoahttán ja iskkagoahttán váikkuhusaid johtolatstašuvnnaid heaittihemiin.

Foto: John Inge Johansen / NRK

Simonsen lea beaivvi čoahkkinastán, muhto čálista ahte dál bargagohtet ja ovdal skábmamánu vuosttaš beaivve dán jagi galget johtalusdepartementii vástidit dáid doaimmaid birra ja váikkuhusain dain.

– Ovdalgo dát bargu gárvána, de ii dáhpáhuva mihkkige min bargiiguin ii ge dáid johtolatstašuvnnaiguin, lohká Simonsen.

Váikkuha gielddaide

Leavnnja johtolatstašuvdna ii leat dušše dán gieldda ássiide dehálaš, go sihke Kárášjoga, Davvenjárgga, Davvesiidda, Muosáid ja Gáŋgaviikka sátnejođiheaddjit leat vuolláičállán dán reivve johtalusministarii.

Maiddái Sámediggepresideanta Aili Keskitalo ja Finnmárkku fylkkasátnejođiheaddji Ragnhild Vassvik vuolláičála lea reivves maid johtalusministtar Jon Georg Dale lea ožžon.

– Mii čájehat ahte dát doaimmat Leavnnjas eai leat dehálačča dušše porsáŋgulaččaide. Dát guoská olu olbmuide dás birra maid, nu go sii geat vuodjinkoarttaid galggašit váldit, čujuha Borch.

Son lohká sullii 12 bargosaji jávkat go Leavnnja johtolatstašuvdna heaittihuvvo.

Sátnejođiheaddji ii jáhke Stáhta geaidnodoaimmahaga nuppástumiid čuohcat dušše Leavnnja johtolatstašuvdnii. Son ballá eará geaidnobálvalusaid maid jávkat dahje sirdot, nu dát bargit geat divodit geainnuid.

Stáhta geaidnodoaimmahaga nuppástuhttin

Dá lea árvalus mas earret eará 22 johtolatstašuvnna Norggas árvalit heaittihuvvot, muhto leat maid olu eará nuppástuhttinárvalusa. Stáhta geaidnodoaimmahat galggašii seastigoahtit. 

Foto: Kjell Are Guttorm / NRK

Johtalusdepartemeantta preassaovddasteaddjit čujuhit dušše dáid preassadieđuide mat leat sáddejuvvon nuppástuhttin plánaid birra eai ge sáhte vel vástidit searvá go ministtar čoahkkimii nu go dán reivves leat bivdán.