Bargiidbellodaga áirras Sámedikki plána- ja ruhtadanlávdegottis, Ronny Wilhelmsen, dadjá ahte sii han diibmá juo čilgejedje NSR:i movt sin mielas ruđat galge juhkkojuvvot.
– Dál orruleamen nu ahte NSR juogo lea vajálduhttán man birra sii diibmá hupme, dahje ahte juo eai beroš, dadjá. Wilhelmsen.
Son lohka danin Bargiidbellodaga bargagoahtán molssaevttolaš bušeahtaid, mas sii dáhttot stuorit oasi ruđain juolluduvvon sámi ásahusaide, vai bohtet sámi álbmogii ávkin.
Guđa bellodagain doarjja
Ronny Wilhelmsen dadjá Bargiidbellodaga ná guhkan ožžon doarjaga guđa sámedikki bellodagain. Bargiidbellodat ii leat vel gárvvistan iige ovddidan molssaevttolaš bušeahta, muhto Wilhelmsen lohka eará bellodagain maiddái seamma oaivil go sis, namalassii ahte ruđat galget boahtit sámi álbmogii ávkin.
– Mii leat dán rádjai ožžon dieđu ahte Árjja, Olgeš, Åarjel-Saemiej Gïelh, Sámit Lulli-Norggas ja Dáloniid listtu áirasat leat gergosat doarjut Bargiidbellodaga. Nu dadja Ronny Wilhelmsen, guhte lohka bellodaga áigut čohkket nana ja viiddis doarjaga.
Ráhkadan spealu
– Norgga ráđđehus lea guokte jagi maŋŋálaga juo unnidan doarjagiid sámi doaimmaide ja Sámediggái. Midjiide leat dušše báhcán smávvaruđat juogadeapmái, ja lea dáid smávvaruđaid nalde ahte bargiidbellodat dál ráhkada spealu. Nu dadja Sámedikki ráđđeláhttu, Ann-Mari Thomassen, ja lohka dálá dili váidalahttin.
Eai dieđe vuos maidege
Ann-Mari Thomassen ii loga vuos sáhttit maidege vástidit movt NSR šaddá dustet dán dili.
– Midjiide lea váttis einnostit ja vástidit go mii eat dieđe makkár bušeahta Bargiidbellodat áigu ovdanbidjat. Nu dadjá Ann-Mari Thomassen.
Son lohka ahte NSR juo lea joavkkuset bakte plána- ja ruhtadanlávdegottis ovddidan rievdadusevttohusaid, ja go eai dieđe movt Bargiidbellodaga evttohus lea sin evtthusa vuostá, de sidjiide lea váttis diehtit maid galget dadjat, lohka Thomassen