Oažžuba filbmastipeandda
Antein Mikkelsen ja Mathis Ståle Mathisen oažžuba filbmabargostipeandda Finnmárkku fylkkas. Fylkkagielda juohká guovtti stipeandda, ovtta aiddo álgán filbmabargái, nuppi fas hárjánan filbmabargái. Mikkelsen, guhte lea máŋga filmma juo ráhkadan, oažžu stipeandda go Fylkkagielda oaivvilda son leat ovtta dain deháleamos kvena ovddasteddjiin su filmmaid bokte. Mathisen fas oažžu stipeandda vai beassá ovdánahttit su buvttadeaddji gelbbolašvuođa. Goappátge oažžuba 150.000 ruvnno guovtti jagis.