– Sii, geaid mun lean jearahallan, muitalit ahte sis lea hui nana ja čielga identitehta ja sámi iešdovdu, muitala Siv Eli Vuolab.
Son lea váldán váldofágačállosa filosofiijas, ja lea čállán gávpotsámiid identitehta birra. Vuolab lea erenoamážit geahčadan makkár gáibádusat ja vuordámušat leat čadnon dán identitehtii.
– Nana sámevuohta
Gávpotsápmelaččain lea maiddái hui nana dáhttu deattuhit ja seailluhit sámevuođaset. Go orrot gávpogiin, gos sámevuohta lea nu unnán oidnosis, de ferte juohkehaš ieš ohcalit ja áimmahuššat sámevuođas.
Dat mearkkaša ahte gávpotsápmelaččain lea hui stuorra dáhttu ja áigumuš dahkat sámevuođa áigeguovdilin iežaset árgabeaivvis, čállá Vuolab masterčállosis.
Maiddái čájeha Vuolaba dutkan ahte gávpogis eai vikka čiegadit sámevuođa.
– Dat ii leat oidnosis mu masterčállosis. Buohkat geaid mun jearahallen, eai vikka čiehkat sámevuođaset, lea baicce nuppe láhkai. Sii leat hui čeavlái dainna, dadjá Siv Eli Vuolab.
Maiddái hástalusat
Dá leat čállosa váldočuoggát:
- Ollugat háliidit doalahit ja deattuhit sámi identitehta gávpogis, gos sámevuohta soaitá leat unnán oidnosis. Dat mielddisbuktá ahte olmmoš ieš hui aktiivvalaččat ferte válljet mo ja goas čájeha sámi identitehta.
- Dat sáhttá leat ovdamearkka dihte hui konsekveanta hállat sámegiela maiddai dakkár arenain gos leat dárogielhállit geat eat ádde. Dat sáhttá suhttadit sin geat eai ádde sámegiela.
- Gávpot addá maid friddjavuođa mearridit mii sápmelaččaid, makkár sápmelaš leat. Indiviida ii dárbbaš nu sakka berostit fuolkečanastumiin. Dat soaitá erenoamáš dehálaš daidda sápmelaččaide, geat easkka leat lahkonišgoahtán sámevuođa ja geaid bearrašat eai soaitte háliidit adnojuvvot sápmelažžan.
- Muhto gávpotsámi eallimis leat maid hástalusat, nu mo ovdagáttut, stereotypiijat, gáibádusat ja vuordámušat dasa mii guoská sápmelašvuhtii. Davvin leat dávjá eambbo negatiiva, máddin ges eksohtalaš govva.
Vuolab oaččui buoremus árvosáni – A, su masterbargguin.