Norgga čázádat- ja energiijadirektoráhta bieggafápmoplánat čujuhit boazodoalloguovlluide
Energiijakommišuvdna dieđuid mielde dárbbaša Norga olu eanet ođasmuvvi energiija jos galgat olahit ON:a dálkkádatmihtuid.
Norgga čázádat- ja energiijadirektoráhta (NČE) ođđaseamos bieggafápmoplána čujuha earret eará boazodoalloguovlluide.
Fosen-akšuvdna lea čájehan ahte ii leat álkes ášši gosa dat bieggaturbiinnat huksejuvvojit.
Maiddái daid guovlluid olggobealde maid NČE evttoha leat čielggadeamen vejolaš bieggafápmoguovlluid.
– Jos ceggejit 72 bieggaturbiinna min geasseorohahkii, de mearkkaša dat min loahpa. Dalle leat geargan boazodolliin, lohká vuorjašuvvan Isak Mathis Triumf gii gullá Ábborášša orohahkii.
Návuotna lea okta daid gielddain gosa Troms Kraft ja Ymber árvvoštallet cegget bieggaturbiinnaid.
Triumf dieđuid mielde eai sáhte massit eanet guohtuneatnamiid. Sin geasseorohagas, Návuotna gielddas, leat jo čieža dahkujávrri. Dan oktavuođas manná maiddái geaidnu orohaga čađa.
Sámediggepresideanta Silje Karine Muotka (NSR) ii cealkke bures boahtima bieggafápmoindustriijai.
– In hálit bieggafápmohuksemat guohtunguovlluide. Lea váttis energiijagáldu, jos eaktu lea dan ahte galgá leat boazodoalloguovlluin.