Nils-Heika (25) giesseårrudahkaj guhkat

Guhtta jage dás åvddåla de divtasvuonak Nils-Heika Aira Andersen Kristiansandaj, Oarjje-Vuodnaj jåhttåj, gånnå åhpadiddjáj låhkå.

Sijddabájkes ierit la juo mælggadav læhkám. Valla juohkka giese de vat Ájluoktaj máhttsá gånnå julevsáme guovdátjin Árranin barggá. Gájka jagijt la oahpestiddjen barggam. Dán giese l ietjájlágásj.

– Dán jage l mujna dávvervuorkán barggo. Jur dálla giesseloahpáj gárvedav, danen gå ådå bargge diehki båhti.

Stádan buoremusát soapptsu

Suohtas la Nils-Heikaj sijddaj vat boahtet. Valla sijddabájkke l ilá unne sunji sjaddam.

– Ájluokta l nav unna sajásj. Ij la nav ållo dahkat dánna. Dálla l bájkke ienemusát giesseloahpe-sadje munji. Stáda l barggo-, skåvllå- ja diertjestibmesadje. Muv mielas de la buorep stádan årrot, dan diehti gå stádan le ienep dahkat juohkka biejve.

– Li dujna buojkulvisá?

– Bassæŋŋa stádan le jagev tjadá rabás. Ájluovtan ij la. Jus dánna galgav vuodjat, de hæhttuv Ájluovt-jávrráj.

Suv mielas le sihke vuogas ja nievrre gájka ulmutjijt avta bájken dåbddåt.

– Ájluovtan dåbdåv ulmutjav guhti rámbuvdan tjuodtju. Kristansandan ij aktak muv dåbdå. Danna lav namádibme. Dasi de lijkkuv. Máhtáv ålgus mannat ja vájku mav barggat.

Ieŋŋilsgielav ienebut gå sámegielav

Nils-Heikan lij sámegiella vuostasjgiellan vuodo- ja joarkkaskåvlån. Gå nav guhkás sámijs årru, de dat nievres láhkáj gielav vájkkudahttá.

– Kristiansandan ienemusát dárustaláv. Muv rádnaj gaskan aj huj ållo ieŋŋilsgiella gullu. Muv mielas de lav ieŋŋilsgiellaj ja dárogiellaj smidásahppo gå sámegiellaj. Dan diehti gå iv sámegielav bæjválattjat ane.

– Rievddá dat gå Divtasvuodnaj boadá?

– Binnáv rievddá. Dálla gå Ájluoktaj båhtiv, de lav sámástam ienep dán vahko gå bårggemános rájes åvdep jage.

(Ártihkal gåvå maŋŋel joarkká)

Giesseårrudagán loajttot

Fámilljan le giessegoahte Svernjunján, Oarjjevuonan, oalges bielen gå vuonav sisi maná.

– Åh, Svernjunnjá! Danna l dåssju loajttotit.

Nils-Heika friddjavuodav riekta láhkáj danna dåbddå.

– Danna l ij la barggo, ja ij la mujna telefåvnån gulludahka. Ulmutja e muv jåvså.

– De dåssju væránndan veludalá?

– He-he-he. Binnáv. Várijt váttsáv ja nuorev buovtjav. Iv buovtja nav ålov majt lijdiv sihtat. Dat la má huj suohtas.

Ruoppsisgiergge l dålusj værrodimsadje Svernjunjá láhkusin. Nils-Heika álu dåk manná gehtjatjit.

– Sidáv tjátjevuolsoajev ruoppsisgierge ålgusjbielen gæhttjalit. Danna l nav tsoahke.

• Lågå aj ietjá tjállagav julevsábmáj:
  Giesen de Kristine (16) sosiála mediajs båttåv válldá