Giesen de Kristine (16) sosiála mediajs båttåv válldá

Jus gulludahka gáhtu, de moasket, ja de ballá galggá juojddáv masset. Huoman de giesen sihtá sosiála mediajt ierit válljit.

Kristine Solstrøm

Divtasvuonak Kristine Solstrøm luodju sosiala media ájgev suolát. Gæssáj de sihtá båttåv válldet.

Foto: Johnny Andersen / NRK

Facebook, Instagram ja Snapchat. Da gålmmå sosiála media stuor ájgev Kristine Solstrøma jánnduris suoládi.

Kristine Solstrøm

Kristine Solstrøm

Foto: Johnny Andersen / NRK

– Iv la goassak låhkåm galla tijma dasi gålli. Vihtta tijma gåjt dal. Lav dasi ållu báddnum.

Vuostasj majt dahka gå smaret le Facebookan guovladit mij dan stuor væráldin dáhpáduvvá.

– Vargga åvddål gå smaredav de dav ájádaláv. Suohtas gæhttjat majt iehtjáda dahki.

Ietjat buoremus bielev sihtá vuosedit

Kristine mielas le suohtas gå ådå rádnajt nehtan gávnná, ja gå ulmutja suv tjállagijt ja gåvåjt lijkkuji. Åvddål gå juojddáv næhttaj biedjá, de la sujna vuorddemusá galla lijkkumijt ja moalgedimijt oadtju.

– Danna l dagu ietjá værált. Ienemusát gehtjav majt iehtjáda næhttaj biedji. Valla gå iesj juojddáv almodav, de lav huj snivva.

Tjáppásamos gåvåjt vállji. Sihtá ietjas buoremus bielev væráldij vuosedit.

– Dagu gielestibme de sjaddá. Ulmutja e almma iellema birra oattjo vuojga diehtet.

Dåssju duolla dálla Facebookaj juojddáv biedja. Instagraman ihkap akti bæjvváj almot, ja Snapchatav álu adná. Man moadda rádjá biejves bæjvváj målssu.

– Akti de filmav almodiv munnu oappás gå dánsajma. Ulmutja dav lijkkujin ja tjajmmin dávk. Lijkkuv gå rádna berusti, valla dåssju gå la nehtan. Almmavuodan iv berustibmáj lijkku.

(Ártihkal gåvå maŋŋel joarkká)

Kristine Solstrøm

– Ulmutjij almma iellem ij la gåktu nehtan åvddånbukti, javllá Kristine Solstrøm.

Foto: Johnny Andersen / NRK

Moasket jus ij la gulludahka

Suv áhttje Måsken årru, ja danna de 4G-gulludagáv le áttjak oadtjum. Dassta de Kristine diedon ávvusij.

– Lav dasi hárjjánam, nehtav juohkka sajen adnet.

Jus la avta sajen gånnå ij la gulludahka, de moasket. La balon juojddáv galggá masset.

– De iv diede majt dahkat. Soajttá siejni nali vádtsáv.

Nehtav ierit vállji gå la giesse

Kristinin ij la sæmmi assto sosiála mediajt giesijt tjuovvot, danen gå la ienep dahkat. La mierredam galggá binnedit.

– Sidáv færra ålggån stuvssit ja rádnaj siegen liehket. Årdnik láhkáj rádnastallat. Ga la giesse de jáhkáv ienemusoasse nuorajs binnedi.

Sosiála media ájgev suolát, luodju Kristine.

– Duola dagu de muhttijn berustav ienep gåvåjt válldet ja nehtan iehtjádijda vuosedit, farra gå hávsskudallat.

Sån la ælvvám rádna e nubbenuppijn asta sáhkadit.

– Buorástahttep, ja de l njuolgga telefåvnnåj. Gå rádna le tjoahken, de ij la buorre jus gájka dåssju telefåvnajda gæhttji ja dav berusti.

Kristine Solstrøm

Kristine ij la dudálasj gå rádna telefåvnåj gillu gå le tjoahken.

Foto: Johnny Andersen / NRK