NRK Meny
Normal

Neavrrit go givssidit psykalašbuohcci?

Olmmoš gii buohcagoahtá psykalaččat navda iežas bijahallon nevrriide, nie navdet ain ollu sápmelaččat, lohká birasterapevta Marit Ellen Inga Bals. Ja das son maid lea čállán iežas masterbarggus mainna gearggai mannan giđa.

Marit Ellen Inga Bals
Foto: Marianne Boine

Marit Ellen Inga Bals muitala iežas čállán masterbarggus justa das maid sámi terapevttat vásihit, go háleštit spykalaš buhcciiguin. Terapevttat gullet dávjá sámiin ahte gii nu lea bidjan baháid dahje nevrriid sin ala, ja danne sii buhcet.

Nuorat navdet maid bijahallon

Bals muitala ahte eai leat dušše vuorrasat olbmot geat navdet iežaset leat bijahallon, go ollu nuoratge navdet iežaset bijahallon nevriide.

Dát jurddašanvuohki lea leamaš juo doloža rájes Sámis, muhtin guovlluin eanet go eará guovlluin.

Alkimus earáid sivahallat

Marit Ellen Inga Bals muitala olbmuid ráhpaseabbot hállat váttuideaset birra jos sáhttet gean nu sivahallat. Go navdet earáid leat sivalažžan váttuide, de sáhttet psykalašváttuin rahpaseabbot hállat.

Sámegiella ja kulturmáhttu dehálaš

Sámiide lea deháleammos beassat hállat iežaset gillii, ja son gii galggašii sidjiide leat háleštanveahkkin, son ferte maid áddet sápmelaččaid kultuvrra.